മുംബൈ: സ്വാതന്ത്ര്യസമര സേനാനി വിഡി സവർക്കർക്കെതിരായ രാഹുൽ ഗാന്ധിയുടെ പരാമർശത്തിൽ കടുത്ത പ്രതേഷധം രേഖപ്പെടുത്തിയ മഹാരാഷ്ട്ര മുഖ്യമന്ത്രി അദ്ദേഹത്തിന്റെ സോഷ്യൽ മീഡിയ പ്രൊഫൈൽ പിക്ചറുകളെല്ലാം സവർക്കറുടെ ചിത്രമാക്കി തന്റെ നിലപാട് വ്യക്തമാക്കി. ട്വിറ്റർ, ഫേസ്ബുക്ക്, ഇൻസ്റ്റഗ്രാം തുടങ്ങി എല്ലാ സമൂഹമാദ്ധ്യമങ്ങളിലെയും ഷിൻഡെയുടെ പേജിന്റെ ഡിസ്പ്ലേ പിക്ച്ചർ സവർക്കറുടെ ചിത്രമാക്കി രാഹുലിന് മറുപടി നൽകിയിരിക്കുകയാണ് മഹാരാഷ്ട്ര മുഖ്യമന്ത്രി.
രാഹുലിന്റെ പരാമർശത്തെ അപലപിച്ച് സംസ്ഥാനത്തെ എല്ലാ ജില്ലകളിലും വീർ സവർക്കർ ഗൗരവ് യാത്ര സംഘടിപ്പിക്കുമെന്ന് നേരത്തെ ഏകനാഥ് ഷിൻഡെ അറിയിച്ചിരുന്നു. രാജ്യത്തിന്റെ സ്വാതന്ത്ര്യത്തിന് വേണ്ടി വലിയ പങ്കുവഹിച്ച സവർക്കറെ പോലെയുള്ള വീരന്മാരുടെ സംഭാവനകൾ കൊണ്ടാണ് ഇന്ത്യയ്ക്ക് സ്വാതന്ത്ര്യം ലഭിച്ചതെന്ന് രാഹുലിനെ ഷിൻഡെ ഓർമ്മിപ്പിച്ചു.
ലോക്സഭാംഗത്വം റദ്ദായതിന് പിന്നാലെ കഴിഞ്ഞയാഴ്ച നടത്തിയ വാർത്താ സമ്മേളനത്തിലായിരുന്നു രാഹുൽ വിവാദ പരാമർശം നടത്തിയത്. ജാതിയധിക്ഷേപ കേസിൽ മാപ്പ് പറയില്ലെന്നും മാപ്പപേക്ഷിക്കാൻ താൻ സവർക്കറല്ലെന്നുമായിരുന്നു രാഹുലിന്റെ പരാമർശം. സംഭവത്തിന് പിന്നാലെ കേന്ദ്രമന്ത്രിമാരടക്കം നിരവധി പേർ രാഹുലിന്റെ പരാമർശത്തെ അപലപിച്ച് എത്തിയിരുന്നു. കോൺഗ്രസുമായി സഖ്യം ചേർന്ന ഉദ്ധവ് താക്കറെ പോലും രാഹുലിനെതിരെ രംഗത്ത് വന്നു.
Comments