ന്യൂഡൽഹി: രാജ്യത്ത് നിന്ന് അനധികൃതമായി കടത്തിയ പുരാവസ്തുക്കൾ ഇന്ത്യക്ക് തിരികെ തന്ന് ന്യൂയോർക്കിലെ മെട്രോപോളിറ്റൻ മ്യൂസിയം. ചരിത്ര പ്രാധാന്യമുള്ള 15-ഓളം ശിൽപ്പങ്ങളാണ് തിരികെ തരുന്നത്. പുരാവസ്തുക്കൾ കള്ളക്കടത്ത് നടത്തുന്ന സുഭാഷ് കപൂറാണ് വിദേശത്തേക്ക് ഇവ കടത്തിയത്.
ബിസി ഒന്നാം നൂറ്റാണ്ട് മുതൽ സിഇ പതിനൊന്നാം നൂറ്റാണ്ട് വരെയുള്ള കലാസൃഷ്ടികളാണിവ. ചെമ്പ്, കല്ല് എന്നിവ ഉപയോഗിച്ചാണ് ഈ കലാ സൃഷ്ടികൾ നിർമ്മിച്ചിട്ടുള്ളത്. വിദേശത്തേക്ക് പുരാവസ്തുക്കൾ കള്ളക്കടത്തുന്നയാളാണ് സുഭാഷ് കപൂർ. ഇയാൾ ഇപ്പോൾ ജയിലിൽ കഴിയുകയാണ്.
‘പുരാവസ്തു കലയുടെ ഉത്തരവാദിത്തപരമായ ഏറ്റെടുക്കലിന് മ്യൂസിയം പ്രതിജ്ഞാബദ്ധമാണ്. പുതിയ സൃഷ്ടികൾ ഏറ്റെടുക്കുന്നതിനും അതിന്റെ ശേഖരത്തിൽ ദീർഘകാലം പ്രവർത്തിക്കുന്നതിനും കർശനമായ തെളിവ് മാനദണ്ഡങ്ങൾ ഉപയോഗിക്കുന്നു. സംശയാസ്പദമായ ഇടപാടുകളിൽ നിന്നുള്ള പുരാവസ്തുക്കളുടെ ചരിത്രം മ്യൂസിയം സജീവമായി അവലോകനം ചെയ്യുന്നുണ്ട്. ഇന്ത്യാ ഗവൺമെന്റുമായുള്ള ദീർഘകാല ബന്ധം മ്യൂസിയം വിലമതിക്കുന്നു. അതിനാൽ ഈ പ്രശ്നം പരിഹരിക്കുന്നതിൽ സന്തോഷമുണ്ട്,’ മെട്രോപോളിറ്റൻ മ്യൂസിയം (മെറ്റ് ) പ്രസ്താവനയിൽ പറഞ്ഞു.
സുഭാഷിനെതിരായ ക്രിമിനൽ കേസിന്റെ അന്വേഷണത്തിൽ പ്രവർത്തിക്കാൻ കഴിഞ്ഞതിൽ സന്തോഷമുണ്ടെന്ന് മാൻഹട്ടൻ ഡിസ്ട്രിക്റ്റ് അറ്റോർണി ഓഫീസ് അറിയിച്ചു.
