ന്യൂയോർക്ക്: ഇന്ത്യയുമായി കൂടുതൽ സഹകരണത്തിന് തയാറാണെന്ന് യുഎസ് നാറ്റോ അംബാസഡർ ജൂലിയൻ സ്മിത്ത്. നോർത്ത് അറ്റ്ലാന്റിക് ട്രീറ്റി ഓർഗനൈസേഷന്റെ ഭാഗമാകാൻ താൽപ്പര്യമുണ്ടെങ്കിൽ ഇന്ത്യയുമായി കൂടുതൽ ബന്ധം പുലർത്താൻ തയാറാണെന്നും സഹകരണം ശക്തമാക്കാൻ ആഗ്രഹിക്കുന്നുവെന്നും ജൂലിയൻ സ്മിത്ത് പറഞ്ഞു.
നിലവിൽ ഇത് വിശാലമായ ആഗോള സൈനിക സഖ്യത്തിലേക്ക് വ്യാപിപ്പിക്കാൻ ഉദ്ദേശിക്കുന്നില്ലെന്നും രാഷ്ട്രീയ സാമ്പത്തിക സഖ്യത്തിലേക്കാണ് കൂടിച്ചേർക്കപ്പെടുന്നതെന്നും അംബാസഡർ ചൂണ്ടിക്കാട്ടി. യുക്രെയ്ൻ ഉൾപ്പെടെ മറ്റ് രാജ്യങ്ങൾക്ക് ഇന്ത്യ നൽകുന്ന സഹായങ്ങളെയും ജൂലിയൻ സ്മിത്ത് പ്രശംസിച്ചു. യുക്രെയ്നിലെ റഷ്യൻ യുദ്ധം അവസാനിപ്പിക്കാൻ ഇന്ത്യയുടെ ഇടപെടൽ ആവശ്യമാണെന്നും അവർ കൂട്ടിച്ചേർത്തു.
‘ഇന്തോ- പസഫിക് ബന്ധം ശക്തിപ്പെടുത്തുകയാണ് ലക്ഷ്യം. നാറ്റോയ്ക്ക് നിലവിൽ ലോകമെമ്പാടും 40 വ്യത്യസ്ത പങ്കാളികളുണ്ട്. ഓരോ വ്യക്തിഗത പങ്കാളിത്തവും വ്യത്യസ്തമാണ്. വിവിധ രാജ്യങ്ങൾ വ്യത്യസ്ത തലത്തിലുള്ള രാഷ്ട്രീയ ഇടപെടലുകൾ തേടി വരുന്നുണ്ട്. ഇന്ത്യക്ക് താൽപര്യമുണ്ടെങ്കിൽ വാതിലുകൾ തുറന്നു കിടക്കുകയാണ്. ഇന്ത്യയുടെ പ്രതികരണം കാത്തിരിക്കുന്നു ‘- ജൂലിയൻ സ്മിത്ത് വെർച്വൽ വാർത്ത സമ്മേളനത്തിൽ വ്യക്തമാക്കി.
Comments