ഹാലാസ്യ മാഹാത്മ്യം ഗദ്യം ജനം ടിവി വെബിൽ പ്രസിദ്ധീകരിക്കുന്നു

ഹാലാസ്യ മാഹാത്മ്യം

ശിവക്ഷേത്രങ്ങളിൽ ഏറ്റവും ശ്രേഷ്ഠമായവ 68 എണ്ണം ആണ്. അതിൽ തന്നെ 16 എണ്ണം കൂടുതൽ പ്രശസ്തങ്ങളാണ്. ഈ 16 ൽ കാശി, കാളഹസ്തി, ചിദംബരം, ഹാലാസ്യം എന്നീ ക്ഷേത്രങ്ങൾ അതി പ്രശസ്തങ്ങളാണ്. ഇന്നത്തെ തമിഴ് നാട്ടിൽ ഉൾപ്പെടുന്ന നമുക്ക് സുപരിചിതമായ മധുര തന്നെയാണ് ഈ ഹാലാസ്യം. അങ്ങിനെയുള്ള ശിവക്ഷേത്രങ്ങളിൽ ഒന്നായ ഹാലാസ്യത്തിന്റെ മധുരയിലെ സോമ സുന്ദരക്ഷേത്രത്തിന്റെ പുരാണ പ്രസിദ്ധി വിളിച്ചോതുന്ന മഹദ് ഗ്രന്ഥമാണ് ഹാലാസ്യ മാഹാത്മ്യം

ഹാലാസ്യം അഥവാ മധുര മറ്റു പുണ്യ സ്ഥലങ്ങളെ അപേക്ഷിച്ചു ശ്രേഷ്ഠമായതിനുള്ള കാരണങ്ങൾ , തീർത്ഥ മാഹാത്മ്യങ്ങൾ , 64 ശിവ ലീലകൾ എന്നിവ ഈ മഹാ ഗ്രന്ഥത്തിൽ പ്രതിപാദിക്കപ്പെട്ടിരിക്കുന്നു.

ആധുനിക കാലത്ത് പാർവതിയുടെ അവതാരമായ മീനാക്ഷിയുടെ ബിംബം പ്രതിഷ്ഠിച്ചിട്ടുള്ള മധുര മീനാക്ഷി ക്ഷേത്രത്തിനാണ് പ്രശസ്തി . എന്നാൽ പ്രാചീന കാലത്തുള്ള പ്രസിദ്ധി സുന്ദരേശ്വര ലിംഗ പ്രതിഷ്ഠക്കും സമീപത്തുള്ള ഹേമ പദ്മിനി തീർത്ഥത്തിനും ആയിരുന്നു . സുന്ദരേശ്വരന്റെ ജടയിൽ വിളങ്ങുന്ന ചന്ദ്രക്കലയിൽ നിന്നുള്ള പീയുഷവർഷത്താൽ നനയുന്നത് കൊണ്ടാണ് മധുരാപുരി എന്ന് ഹാലാസ്യത്തിനു പേരുണ്ടായത് എന്നാണ് വിശ്വാസം.

ഹാലാസ്യ മാഹാത്മ്യം മറ്റുള്ള പുരാണങ്ങളെ പോലെ വെറും മിത്തല്ല. ഇതിൽ ചരിത്രം ഭംഗിയായി ഇഴചേർന്നിട്ടുണ്ട്. പാണ്ഢ്യ രാജകുമാരിയായി ജനിച്ച ശ്രീ പാർവതിയെ ശിവഭഗവാൻ സുന്ദരേശ്വര രൂപത്തിൽ വന്നു വിവാഹം ചെയ്തു,പിന്നീട് ആ സുന്ദരശ്വരൻ പാണ്ഢ്യ രാജാവായി.ശങ്കര സംഹിത അഥവാ അഗസ്ത്യ സംഹിതയിലെ ഹാലാസ്യ മാഹാത്മ്യം പുരാണവും ചരിത്രവും കൂടി കലർന്ന കഥകളുടെ കലവറയാണ്

നീലകണ്ഠ ദീക്ഷിതരുടെ സംസ്കൃത കൃതിയായ ശിവലീലാർണ്ണവത്തിൽ വർണ്ണിക്കപ്പെട്ടിരിക്കുന്ന 64 ശിവലീലകളും ഇതിലുണ്ട്. പ്രാചീന തമിഴ് സാഹിത്യത്തിലെ പ്രസിദ്ധമായ സംഘം കവിതകളിൽ പരാമർശിച്ചിട്ടുള്ള മലയദ്ധ്വജ പാണ്ഢ്യൻ, സുന്ദരേശ പാണ്ഢ്യൻ, തിരു ജ്ഞാന സംബന്ധർ , മാണിക്യ വാചകർ മുതലായവരും, സംഘം കവികളിൽ ഒരാളായ നക്കീരനും ഇതിലെ ചില കഥാപാത്രങ്ങളായി വരുന്നുണ്ട്.

സംസ്‌കൃത പണ്ഡിതനും വാഗ്മിയും ആയിരുന്ന ചാത്തുക്കുട്ടി മന്നാഡിയാർ ഹാലാസ്യ മാഹാത്മ്യത്തെ മലയാളം കിളിപ്പാട്ട് രൂപത്തിൽ വിവർത്തനം ചെയ്തിട്ടുണ്ട് .അതിന്റെ അടിസ്ഥാനത്തിൽ കെ രാധാമണി തമ്പുരാട്ടി പുനരാഖ്യാനം നിർവഹിച്ച ഹാലാസ്യ മാഹാത്മ്യം ഗദ്യം ജനം ടിവി വെബിൽ പ്രസിദ്ധീകരിക്കുന്നു.

ആലപ്പുഴ സനാത ധർമ്മ വിദ്യാലയത്തിൽ അധ്യാപികയായിരുന്ന കെ രാധാമണി തമ്പുരാട്ടി ഔദ്യോഗിക രംഗത്തു നിന്ന് വിരമിച്ച ശേഷം ആധ്യാത്മിക രചനകൾ നിർവ്വഹിച്ചുകൊണ്ടിരിക്കുന്നു .

ശിവാവതാരങ്ങൾ, ശിവകഥാമൃതം, (ഡി സി ബുക്സ്), ശിവജ്ഞാനാമൃതം, ശിവസ്തോത്രമാല, ശിവമഹാസ്തോത്രവും ശിവസഹസ്രനാമവും (കേരളാ ബുക്ക് ട്രസ്റ്റ് കോഴിക്കോട്), ശിവപുരാണ സംഗ്രഹം (ഗുരുവായൂർ ദേവസ്വം), എന്നീ പുസ്തകങ്ങൾ പ്രസിദ്ധീകരിച്ചിട്ടുണ്ട്.