രാജസ്ഥാൻ റോയൽസ് ക്യാപ്റ്റൻ സഞ്ജു സാംസണിന്റെ ശബ്ദം അനുകരിച്ച് നടൻ ജയറാം. ഇൻസ്റ്റഗ്രാം പേജിലാണ് സഞ്ജുവിന്റെ ശബ്ദം അനുകരിച്ചുകൊണ്ടുള്ള വീഡിയോ ജയറാം പങ്കുവെച്ചത്. സഞ്ജുവിനും ടീമിനും വിജയാശംസകളും താരം നേർന്നു. പോസ്റ്റ് ചെയ്ത് മണിക്കൂറുകൾക്കുള്ളിൽ തന്നെ വീഡിയോ വൈറലാവുകയായിരുന്നു.
ഇരുവരും തമ്മിലുള്ള സൗഹൃദം ആരാധകർക്ക് സുപരിചിതമാണ്. സഞ്ജുവും ഭാര്യ ചാരുവും ചെന്നൈയിലെ ജയറാമിന്റെ വീട് സന്ദർശിച്ച ചിത്രങ്ങൾ മുമ്പ് വൈറലായിരുന്നു. ശബ്ദദം അനുകരിച്ചുകൊണ്ട് പങ്കുവെച്ച വീഡിയോയിൽ ഇരുവരുടെയും കുടുംബങ്ങൾ ഒന്നിച്ചുള്ള ചിത്രങ്ങളും കാണാം. സൺറൈസേഴ്സ് ഹൈദരാബാദിനെതിരെ നടന്ന ആദ്യ മത്സരത്തിൽ മിന്നും പ്രകടനമാണ് സഞ്ജു സാംസൺ കാഴ്ചവെച്ചത്.
ഹൈദരാബാദിനെതിരെ 203 എന്ന കൂറ്റൻ സ്കോറാണ് രാജസ്ഥാൻ നേടിയത്. സഞ്ജുവിന്റെ ഹാഫ് സെഞ്ച്വറിയാണ് ടീമിന് കരുത്തേകിയത്. 32 ബോളിൽ നാല് സിക്സുകളും മൂന്ന് ഫോറുകളും അടങ്ങിയതായിരുന്നു താരത്തിന്റെ അർദ്ധ സെഞ്ച്വറി. ഐപിഎൽ മത്സരങ്ങളൽ തുടർ്ച്ചയായി നാലാം തവണയാണ് ആദ്യ മത്സരത്തിൽ തന്നെ സഞ്ജു അർദ്ധ സെഞ്ച്വറി കരസ്ഥമാക്കുന്നത്.
Comments