തെന്നിന്ത്യൻ സിനിമാ ലോകത്തെ ഏറ്റവും പ്രിയപ്പെട്ട താരജോഡികളാണ് സൂര്യയും ജ്യോതികയും. തെന്നിന്ത്യ മുഴുവനും ആരാധകരുള്ള ഈ താരദമ്പതികളുടെ വാർത്തയെല്ലാം വളരെപ്പെട്ടന്നാണ് വെെറലാകുന്നത്. ഇപ്പോഴിതാ പ്രണയിച്ച് വിവാഹിതരായ താരങ്ങൾക്ക് വിവാഹത്തിനായി കാത്തിരിക്കേണ്ടി വന്നത് 4 വർഷമാണെന്ന് തുറന്ന് പറഞ്ഞിരിക്കുകയാണ് സൂര്യയുടെ പിതാവായ ശിവകുമാർ.
ഒട്ടനവധി സിനിമകളിൽ ഒരുമിച്ച് അഭിനയിച്ചിട്ടുള്ള താരങ്ങൾ പിന്നീട് പ്രണയത്തിലാവുകയും തുടർന്ന് 2006-ൽ ഇരുവരും വിവാഹിതരാകുകയുമായിരുന്നു. എന്നാൽ വിചാരിച്ചത്ര എളുപ്പമായിരുന്നില്ല ഇരുവരുടെയും വിവാഹമെന്നാണ് ശിവകുമാർ പറയുന്നത്. ഒരു യൂട്യൂബ് ചാനലിന് നൽകിയ അഭിമുഖത്തിലാണ് സൂര്യയുടെ പിതാവായ ശിവകുമാർ ഇക്കാര്യങ്ങൾ വ്യക്തമാക്കിയത്.
ജ്യോതികയുടെ കാര്യം അറിഞ്ഞപ്പോഴൊക്കെ തങ്ങൾ മൗനം പാലിക്കുകയായിരുന്നു. സൂര്യക്ക് സ്വന്തം ഇഷ്ടത്തിന് ജീവിക്കാനും തീരുമാനമെടുക്കാനുമുള്ള അവകാശം നൽകിയിരുന്നു എന്നും ശിവകുമാർ പറഞ്ഞു.
കാക്ക കാക്ക സിനിമയുടെ ഷൂട്ടിങ്ങിനിടെ ഇരുവരും പ്രണയത്തിൽ ആയതെന്നാണ് വിവരം. 2003 ലാണ് കാക്ക കാക്ക സിനിമ റിലീസ് ചെയ്തത്. ചിത്രം റിലീസ് ചെയ്തതിന് ശേഷം ഇരുവരുടെയും വിവാഹ നിശ്ചയവും നടന്നു. വളരെ സ്വകാര്യമായിട്ട് നടന്ന ഒരു ചടങ്ങായിരുന്നു അത്. വീട്ടുകാരെ തങ്ങളുടെ ബന്ധത്തെ കുറിച്ച് ബോധ്യപ്പെടുത്താനും കുറച്ചു സമയം ലഭിക്കാനും വേണ്ടിയാണു ഇരുവരും നേരത്തെ നിശ്ചയം നടത്തി വെച്ചത് എന്നാണ് വിവരം. 2006 സെപ്റ്റംബർ 11 ന് ചെന്നൈയിലെ പാർക്ക് ഷെറാട്ടൺ ഹോട്ടലിൽ വെച്ചാണ് സൂര്യയുടെയും ജ്യോതികയുടെയും വിവാഹം നടന്നത്.
ഇരുവരും ഒന്നിച്ചഭിനയിച്ച കാക്ക കാക്ക ബോക്സ് ഓഫീസിൽ വമ്പൻ ഹിറ്റായി മാറിയിരുന്നു. ഒറ്റ രാത്രി കൊണ്ട് ഇരുവരും വലിയ താരങ്ങളായി മാറി. കേരളത്തിൽ ഉൾപ്പടെ വലിയ സ്വീകാര്യതയാണ് ചിത്രത്തിന് ലഭിച്ചത്. പിന്നീട് അങ്ങോട്ട് ഓരോ ദിവസം കഴിയുന്തോറും സൂര്യ ജ്യോതിക ബന്ധം കൂടുതൽ ദൃഢമായി വരികയായിരുന്നു. രണ്ട് മക്കളാണ് ഇരുവർക്കും ഉള്ളത്.
ഇന്ന് സൂര്യയ്ക്കും ജ്യോതികയ്ക്കും നിരവധി ആരാധകരാണ് ഉള്ളത്. കഴിഞ്ഞ വർഷമാണ് ഇരുവർക്കും ദേശീയ അവാർഡ് ലഭിച്ചത്. സൂര്യ 42, വടിവാസൽ തുടങ്ങിയ ചിത്രങ്ങളാണ് സുര്യയുടേതായി അണിയറയിൽ ഒരുങ്ങുന്നത്. രണ്ടു ചിത്രങ്ങളാണ് ജ്യോതികയുടേതായി പുറത്തിറങ്ങാൻ ഇരിക്കുന്നത്. വർഷങ്ങൾക്ക് ശേഷം ജ്യോതിക മലയാളത്തിൽ അഭിനയിക്കുന്ന സിനിമ മമ്മൂട്ടിയൊടൊപ്പമാണ്. കാതൽ ദി കോറിൽ മമ്മൂട്ടിയുടെ നായികയായി താരത്തെ കാണാനുള്ള ആവേശത്തിലാണ് ആരാധകർ.
Comments