മലയാള സിനിമയിൽ തന്റെ വ്യക്തിമുദ്ര പതിപ്പിക്കാനാകുന്ന ചിത്രങ്ങൾ കാളിദാസന് ലഭിച്ചിരുന്നില്ലെങ്കിലും തമിഴിൽ താരം തിളങ്ങി. പുത്തം പുതു കാലൈ, പാവ കഥൈകൾ തുടങ്ങിയ ആന്തോളജി ചിത്രങ്ങളിലെയും കമൽഹാസൻ നായകനായ വിക്രത്തിലെയും കാളിദാസന്റെ പ്രകടനം വളരെയേറെ പ്രേക്ഷക സ്വീകാര്യത നേടിയിരുന്നു. വിക്രത്തിൽ കമൽഹാസന്റെ ടൈറ്റിൽ കഥാപാത്രത്തിന്റെ മകന്റെ വേഷമായിരുന്നു കാളിദാസൻ അവതരിപ്പിച്ചിരുന്നത്. ഇപ്പോഴിതാ കമൽഹാസനൊപ്പം അടുത്ത ചിത്രത്തിലും കാളിദാസനുണ്ട്.
ഷങ്കർ-കമൽ ഹാസൻ കൂട്ടുകെട്ടിൽ ഒരുങ്ങുന്ന എക്കണോമിക് ചിത്രമായ ഇന്ത്യന്റെ സീക്വൽ ഇന്ത്യൻ 2 ആണ് പുതിയതായി അണിയറയിൽ ഒരുങ്ങുന്ന ചിത്രം. ഷൂട്ടിംഗ് തുടങ്ങിയ ചിത്രത്തിന്റെ തായ്വാൻ ഷെഡ്യൂളുകളിൽ കാളിദാസൻ ജോയിൻ ചെയ്തു എന്ന റിപ്പോർട്ടുകളാണ് പുറത്തു വരുന്നത്. ചിത്രത്തിന്റെ ഷൂട്ടിംഗിന് പിന്നാലെ ഷങ്കറിനൊപ്പം നിൽക്കുന്ന ഒരു ചിത്രവും താരം ഇൻസ്റ്റഗ്രാമിലൂടെ പങ്കുവെച്ചിരുന്നു. കാജൽ അഗർവാൾ, രാകുൽ പ്രീത് സിംഗ് , പ്രിയ ഭവാനി ശങ്കർ, ബോബി സിംഹ ,സിദ്ധാർത്ഥ്,സമുദ്രക്കനി, ഗുഗു സോമസുന്ദരം, ഗുൽഷൻ ഗ്രോവർ എന്നിങ്ങനെ നിരവധി പേരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. തായ്വാനിലെ പ്രധാന ഷെഡ്യൂളിന് ശേഷം ടീം അംഗങ്ങൾ ദക്ഷിണാഫ്രിക്കയിലേക്ക് പോകും. ഒരു മാസം നീളുന്ന ചിത്രീകരണമാണ് ഇവിടെ നടക്കുക. ആക്ഷൻ രംഗങ്ങളാണ് ഇവിടെ കൂടുതലും ചിത്രീകരിക്കുന്നത്.
1996-ലാണ് ഇന്ത്യൻ പുറത്തിറങ്ങുന്നത്. മികച്ച പ്രേക്ഷകാഭിപ്രായം നേടിയ ചിത്രം ബോക്സഓഫീസിലും വൻ വിജയം നേടിയിരുന്നു. ചിത്രത്തിൽ കമൽഹാസനൊപ്പം ഊർമിള മാണ്ഡോദികറും മനീഷ കൊയാരാളയും ചിത്രത്തിൽ കേന്ദ്ര കഥാപാത്രങ്ങളെ അവതരിപ്പിച്ചിരുന്നു. ചിത്രത്തിലെ മികച്ച പ്രകടനത്തിന് കമലഹാസനെ തേടി ദേശീയ അവാർഡും എത്തിയിരുന്നു.
Comments