ബെംഗളുരു: കന്നട സൂപ്പർ താരം കിച്ച സുദീപ് ബിജെപിയിൽ ചേരുമെന്ന റിപ്പോർട്ടുകൾ പുറത്ത് വരുന്നതിനിടെ താരത്തിന് അഞ്ജാത ഭീഷണി കത്ത്. താരത്തിന്റെ സ്വകാര്യ ചിത്രങ്ങൾ പുറത്ത് വിടുമെന്ന കത്ത് നടന്റെ മാനേജർക്കാണ് ലഭിച്ചത്. സംഭവത്തിൽ പോലീസ് കേസ് രജിസ്റ്റർ ചെയ്തു.
കത്തിൽ സുദീപിനെതിരെ അപകീർത്തികരമായ പദങ്ങളുണ്ടെന്ന് താരത്തിന്റെ സുഹൃത്തും മാനേജറുമായ ജാക്ക് മഞ്ജു പറഞ്ഞു. താരത്തിന്റെ പരാതിയിൽ ബെംഗളൂരുവിലെ പുട്ടനഹള്ളി പോലീസ് സ്‌റ്റേഷനിലാണ് എഫ്‌ഐആർ രജിസ്റ്റർ ചെയ്തിരിക്കുന്നത്.
അടുത്ത മാസം നടക്കുന്ന കർണാടക നിയമസഭാ തിരഞ്ഞെടുപ്പിൽ സുദീപ് ബിജെപിക്ക് വേണ്ടി പ്രചാരണം നടത്താൻ സാധ്യതയുണ്ട്. മെയ് 10-നാണ് കര്‍ണാടക നിയമസഭാ തിരഞ്ഞെടുപ്പ്. മെയ് 13-ന് വോട്ടെണ്ണും.
തെന്നിന്ത്യയിൽ നിരവധി ആരാധകരുള്ള താരമാണ് കിച്ച സുദീപ്. കർണാടകയിലെ പുണ്യകോടി ദത്തു യോജനയുടെ അംബാസഡർ കൂടിയാണ് താരം. പൊതുജനങ്ങളുടെ സഹകരണത്തോടെ ഗോശാലകൾ സാമ്പത്തികമായി മികച്ചതാക്കുക എന്നതാണ് പദ്ധതി. ഇതിനെ പൂർണതയിലെത്തിക്കാൻ താരത്തിന് കഴിഞ്ഞിരുന്നു.
