ഇടുക്കി: അരിക്കൊമ്പനെ പറമ്പിക്കുളത്തേക്ക് കൊണ്ടുവരരുതെന്ന് പ്രദേശ വാസികൾ. നാളെ പറമ്പിക്കുളത്ത് ജനകീയ പ്രതിഷേധം സംഘടിപ്പിക്കാനാണ് തീരുമാനം. ഈ നീക്കം തടയണമെന്ന് ആവശ്യപ്പെട്ട് നെന്മാറ എം എൽ എ കെ ബാബു മുഖ്യമന്ത്രിക്ക് കത്ത് നൽകി. മുഖ്യമന്ത്രിക്കും വനം മന്ത്രിക്കുമാണ് കത്ത് നൽകിയിരിക്കുന്നത്.
അരിക്കൊമ്പനെ ഇടുക്കിയിൽ നിന്നും പറമ്പിക്കുളത്തേക്ക് കൊണ്ടുവരാനുള്ള നീക്കം ഉപേക്ഷിക്കണമെന്ന് ബി ഡി ജെ എസ് സംസ്ഥാന വൈസ് പ്രസിഡന്റ് എ എൻ അനുരാഗും രംഗത്ത് എത്തിയിട്ടുണ്ട്. പറമ്പിക്കുളം മേഖലയിൽ നിരവധി കോളനികളിലായി നൂറുകണക്കിന് വീടുകളും നിരവധി ആളുകളും വസിക്കുന്നുണ്ട്. അവരുടെ ജീവനും സ്വത്തിനും ഭീഷണി ആകുന്ന നീക്കം പ്രതിഷേധാർഹമാണ്. സർക്കാർ പിന്തിരിഞ്ഞില്ലെങ്കിൽ പ്രധിഷേധ പരിപാടികൾ സംഘടിപ്പിക്കുമെന്നും ബിഡിജെഎസ് അറിയിച്ചു.
ചൊവ്വാഴ്ച രാവിലെയാണ് അരിക്കൊമ്പനെ ചിന്നക്കനാലിൽ നിന്നും മാറ്റാൻ കോടതി ഉത്തരവിറക്കിയത്. ചിന്നക്കനാലിൽ നിന്നും പറമ്പിക്കുളത്തേക്ക് മാറ്റാനാണ് അനുമതി. വിദഗ്ധ സമിതി റിപ്പോര്ട്ടിന്റെ അടിസ്ഥാനത്തിലാണ് നടപടി സ്വീകരിച്ചത്.
