ന്യൂഡൽഹി: രാജ്യത്ത് നൂതനമായ പരിഹാരമാർഗങ്ങളും ഉത്പന്നങ്ങളും സൃഷ്ടിക്കാൻ സ്ത്രീകളെ പ്രോത്സാഹിപ്പിക്കേണ്ട സമയമാണിതെന്ന് രാഷ്ട്രപതി ദ്രൗപദി മുർമു. സ്ത്രീകൾക്ക് കൂടുതൽ പിന്തുണ നൽകിയാൽ അവർ ഈ മേഖലയിൽ മികച്ചനേട്ടം കാഴ്‌ച്ചവെക്കുമെന്നും രാഷ്ട്രപതി പറഞ്ഞു. നാഷണൽ ഇന്നോവേഷൻ ഫൗണ്ടേഷന്റെ പതിനൊന്നാമത് ബിനാലെ നാഷണൽ ഗ്രാസ്റൂട്ട് ഇന്നൊവേഷൻ ആൻഡ് ഔട്ട്സ്റ്റാൻഡിംഗ് ട്രഡീഷണൽ നോളജ് അവാർഡിൽ വെച്ചായിരുന്നു രാഷ്‌ട്രപതിയുടെ പരാമർശം.
കുടുംബങ്ങൾ സ്ത്രീകളെ കൂടുതൽ പിന്തുണയ്‌ക്കാൻ തുടങ്ങിയാൽ, അവർ മറ്റ് മേഖലകളിൽ ചെയ്യുന്നതുപോലെ നൂതന പരിഹാര മേഖലയിലും ഉത്പന്നങ്ങളിലും കൂടുതൽ സംഭാവനകൾ നൽകുമെന്ന് ചടങ്ങിനെ അഭിസംബോധന ചെയ്തുകൊണ്ട് രാഷ്ട്രപതി പറഞ്ഞു. ‘ഇവിടെ ആദരിക്കപ്പെട്ട 13 ദേശീയ അവാർഡ് ജേതാക്കളിൽ ഒരു സ്ത്രീ മാത്രമേയുള്ളൂവെന്ന് ഞാൻ ശ്രദ്ധിച്ചു. എല്ലാ സ്ത്രീകളും അവരുടെ വീട്ടുജോലികളിലും മറ്റ് മേഖലകളിലുമാണ് സർഗ്ഗാത്മകത ദിനംപ്രതി ഉപയോഗിക്കുന്നത്. രാജ്യത്തിന് ആവശ്യമായ നൂതനമായ പരിഹാരങ്ങളും ഉൽപ്പന്നങ്ങളും കൊണ്ടുവരാൻ സ്ത്രീകളെ പ്രോത്സാഹിപ്പിക്കേണ്ട സമയമാണിത്’ എന്ന് രാഷ്ട്രപതി പറഞ്ഞു.
കുട്ടികളെയും യുവാക്കളെയും ചോദ്യങ്ങൾ ഉന്നയിക്കാൻ പ്രേരിപ്പിക്കുന്ന ഒന്നാണ് സർഗാത്മകത. വെല്ലുവിളികൾ നിറഞ്ഞ പ്രശ്‌നങ്ങൾക്ക് പരിഹാരം കണ്ടെത്താനായി ജിജ്ഞാസയും അന്വേഷണ മനോഭാവവും അനിവാര്യമാണ്. നമ്മുടെ കുട്ടികൾ പരിഹാരം കണ്ടെത്തുന്നവരായി മാറണം. അവരുടെ മനസ്സും ആ ദിശയിൽ പ്രവർത്തിക്കണം. കുട്ടികൾക്ക് പരിഹാരം കണ്ടെത്തുവാനുള്ള കഴിവുണ്ടെന്ന് തിരിച്ചറിഞ്ഞാൽ അവർ ക്രിയാത്മകവും നൂതനവുമായ പരിഹാരമാർഗ്ഗങ്ങൾ കണ്ടെത്തുമെന്നും രാഷ്ട്രപതി പറഞ്ഞു.
രാജ്യം അഭിമുഖീകരിക്കുന്ന പ്രശ്‌നങ്ങൾ തിരിച്ചറിയാനും പരിഹരിക്കാനും പൗരന്മാർക്ക് ഉത്തരവാദിത്വമുണ്ട്. പരിസ്ഥിതി സൗഹൃദവും സുസ്ഥിരവുമായ പരിഹാരങ്ങൾ കണ്ടെത്തുന്നതിനും ഈ മേഖലയെ നവീകരിക്കുന്നതിനും പ്രോത്സാഹിപ്പിക്കുന്നതിനും സംരംഭകർ, വ്യവസായ പ്രതിനിധികൾ എന്നിവരോട് രാഷ്ട്രപതി അഭ്യർത്ഥിച്ചു. സുസ്ഥിരവും സമഗ്രവുമായ വികസനം കൈവരിക്കുന്നതിന് ഏവരും പരിശ്രമിക്കണമെന്നും രാഷ്ട്രപതി നിർദേശിച്ചു
