നിയമസഭാ തിരഞ്ഞെടുപ്പ് ചൂടിലാണ് കർണ്ണാടകയിപ്പോൾ. കനത്ത പ്രചരണത്തിലാണ് അവിടെ രാഷ്ട്രീയ പാർട്ടികൾ. തിരഞ്ഞെടുപ്പുകളിൽ പ്രചരണ ഗാനമായി സിനിമാ ഗാനങ്ങളുടെ പാരഡി ഒരുക്കുന്നത് പുതിയ സംഭവമല്ല. എന്നാലിതാ ലോകജനതയ്ക്കിടയിൽ തരംഗമായ ‘ആർആർആർ’ എന്ന തെലുങ്ക് ചിത്രത്തിലെ ഓസ്കർ പുരസ്കാരം നേടിയ നാട്ടു നാട്ടു എന്ന ഗാനമാണ് ഇത്തവണ കർണ്ണാടക ബിജെപി പ്രചരണ ഗാനമായി ഒരുക്കിയിരിക്കുന്നത്.
.
ಪ್ರಧಾನಮಂತ್ರಿ ಶ್ರೀ @narendramodi ಅವರ ನೇತೃತ್ವದಲ್ಲಿ ನಮ್ಮ ಡಬಲ್ ಎಂಜಿನ್ @BJP4Karnataka ಸರ್ಕಾರವು ಕರ್ನಾಟಕದಲ್ಲಿ ಕೈಗೊಂಡಿರುವ ಅಭಿವೃದ್ಧಿಯ ಪರ್ವವನ್ನು ಅದ್ಭುತವಾದ ಹಾಡಿನ ಮೂಲಕ ಜನರಿಗೆ ತಲುಪಿಸುವ ಕೆಲಸ ಮಾಡುತ್ತಿರುವ @BJYM ಪ್ರಯತ್ನ ಶ್ಲಾಘನೀಯ. pic.twitter.com/CCi9BBoGyp
— Dr Sudhakar K (@mla_sudhakar) April 11, 2023
കർണ്ണാടക ആരോഗ്യമന്ത്രി കെ സുധാകറാണ് പ്രചരണ ഗാനത്തിന്റെ വീഡിയോ ട്വിറ്ററിൽ പങ്കുവെച്ചിരിക്കുന്നത്. ‘പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള ഞങ്ങളുടെ ഇരട്ട എഞ്ചിൻ ബിജെപി കർണ്ണാടക സർക്കാരിന്റെ വികസനോത്സവം അതിമനോഹരമായ ഗാനത്തിലൂടെ ജനങ്ങളിലെത്തിക്കാൻ പ്രവർത്തിക്കുന്നവരായ യുവമോർച്ചയുടെ ശ്രമങ്ങൾ പ്രശംസനീയം’- എന്ന് അദ്ദേഹം ട്വീറ്റ് ചെയ്തു.
കേന്ദ്രസർക്കാരിന്റെ നേട്ടങ്ങൾ ഉയർത്തിക്കാട്ടി വികസനങ്ങളും ക്ഷേമപദ്ധതികളും ഊന്നിപ്പറഞ്ഞുകൊണ്ടാണ് പ്രചരണ ഗാനമായി നാട്ടു നാട്ടു റീമിക്സ് ചെയ്ത് പുറത്തിറക്കിയിരിക്കുന്നത്. ഒറിജിനൽ നാട്ടു നാട്ടു വരികൾക്ക് പകരം മോദി മോദി എന്നതാണ് പ്രചരണ ഗാനത്തിന്റെ ഹൈലൈറ്റ്. പ്രസിദ്ധമായ ‘നാട്ടു നാട്ടു’ ചുവടും വീഡിയോയിൽ അനുകരിക്കുന്നുണ്ട്. ശിവമോഗ വിമാനത്താവളം, ബംഗളൂരു-മൈസൂർ എക്സ്പ്രസ് വേ, മെട്രോ ലൈനുകൾ, ജൻ ഔഷധി, കഴിഞ്ഞ മൂന്ന് വർഷമായി സംസ്ഥാനത്ത് നടപ്പിലാക്കിയ ബിജെപി സർക്കാരിന്റെ മറ്റ് ക്ഷേമപദ്ധതികൾ തുടങ്ങി നിരവധി പദ്ധതികളെക്കുറിച്ച് വിവരിക്കുന്നതായിരുന്നു വരികൾ.
വീഡിയോ സമൂഹമാദ്ധ്യമങ്ങളിൽ വൈറലായിക്കഴിഞ്ഞു. 2023-ലെ തിരഞ്ഞെടുപ്പ് പോരാട്ടം പ്രധാനമായും നടക്കുന്നത് ബിജെപി, കോൺഗ്രസ്-ജനതാദൾ സഖ്യവും തമ്മിലാണ്. കർണ്ണാടകയിൽ മെയ് 10-നാണ് നിയമസഭ തിരഞ്ഞെടുപ്പ് നടക്കുക. മെയ് 13-നാണ് വോട്ടെണ്ണൽ.
