തിരുവനന്തപുരം: കേരളത്തിലെക്കുള്ള ആദ്യ വന്ദേ ഭാരത് എക്സ്പ്രസ് അധികം വൈകാതെ സംസ്ഥാനത്ത് ഓടിത്തുടങ്ങുമെന്ന് ഇന്ത്യൻ റെയിൽവേ പാസഞ്ചേഴ്സ് അമിനിറ്റീസ് കമ്മിറ്റി ചെയർമാൻ പി.കെ. കൃഷ്ണദാസ്. പുതിയ തീവണ്ടികളുടെ നിർമ്മാണ പ്രവർത്തനം നടക്കുകയാണെന്നും പുതിയ വന്ദേ ഭാരത് എക്സ്പ്രസുകളുടെ പ്രഖ്യാപനത്തിൽ കേന്ദ്ര റെയിൽവേ മന്ത്രാലയം കേരളത്തെ പരിഗണിക്കുമെന്നാണ് പ്രതീക്ഷയെന്നും അദ്ദേഹം മാദ്ധ്യമങ്ങളോട് വ്യക്തമാക്കി.
‘സ്വാതന്ത്ര്യാനന്ത ഭാരതം കണ്ട ഏറ്റവും വലിയ റെയിൽവേ വികസനമാണ് കഴിഞ്ഞ 9 വർഷങ്ങളായി കേന്ദ്രസർക്കാർ ഭാരതത്തിൽ നടത്തികൊണ്ടിരിക്കുന്നത്. കേരളത്തിന്റെ വന്ദേ ഭാരത് എക്സ്പ്രസ് തീവണ്ടികൾക്കായുള്ള എല്ലാ മുന്നൊരുക്കങ്ങളും പൂർത്തിയായി. വരുന്ന ജൂൺ മാസത്തോടെ വന്ദേ ഭാരത് എക്സ്പ്രസ് കേരളത്തിൽ ഓടിത്തുടങ്ങുമെന്നാണ് റിപ്പോർട്ടുകൾ.
തിരുവനന്തപുരം മുതൽ കാസർകോട് വരെ എക്സപ്രസ് ടെയിനുകളുടെ വേഗത 130 മുതൽ 160 വരെ ആക്കുന്നതിന്റെ ഭാഗമായി റെയിൽവേ ലിഡാർ സർവെ നടത്തും. ഈ മാസം അവസാനം ഹെലികോപ്റ്റർ മുഖേനയാണ് ലിഡാർ സർവേ നടത്തുക. കേരളത്തിന് രണ്ട് വന്ദേ ഭാരത് ട്രെയിനുകൾ ഉടൻ എത്തുമെന്നാണ് പ്രതീക്ഷിക്കുന്നത്. ഈ മാസം 24-ന് പ്രധാനമന്ത്രിയുടെ കേരള സന്ദർശനത്തിൽ ഇതുസംബന്ധിച്ച പ്രഖ്യപനങ്ങൾക്ക് കാത്തിരിക്കുകയാണ് സംസ്ഥാനം’- കൃഷ്ണദാസ് വ്യക്തമാക്കി
