കോഴിക്കോട് : എലത്തൂര് ട്രെയിന് ആക്രമണത്തില് യു.എ.പി.എ ചുമത്തിയതോടെ കേസ് ദേശീയ അന്വേഷണ ഏജന്സി ഏറ്റെടുക്കാനുള്ള സാധ്യതകള് വര്ദ്ധിച്ചു. തീവ്രവാദ പ്രവര്ത്തനങ്ങള്ക്കെതിരെയുള്ള യുഎപിഎ 16-ാം വകുപ്പ് പ്രകാരമാണ് പ്രതി ഷാറൂഖ് സെയ്ഫിക്കെതിരെ കേസ് ചുമത്തിയിരിക്കുന്നത്. ഇതോടെ ട്രെയിന് ആക്രമണത്തിലെ തീവ്രവാദ ബന്ധവും പോലീസ് സ്ഥിരീകരിച്ചിരിക്കുകയാണ്. പ്രതി ഷാറൂഖ് സെയ്ഫിയുടെ കസ്റ്റഡി കാലാവധി നാളെ അവസാനിക്കുകയാണ്.
കേസ് രജിസ്റ്റര് ചെയ്യുമ്പോള് കൊലപാതക ശ്രമം, ആസിഡ് പോലുള്ള വസ്തുക്കള് ഉപയോഗിച്ച് ഗുരുതര പൊള്ളലേല്പ്പിക്കല് എന്നീ കുറ്റങ്ങളും, ഇന്ത്യന് റെയില്വേ നിയമത്തിലെ 151-ാം നകുപ്പ് പ്രകാരവുമാണ് പോലീസ് കുറ്റം ചുമത്തിയിരുന്നത്. ട്രെയിനില് തീവയ്ക്കുന്നതിനിടയില് കൊല്ലപ്പെട്ട മൂന്ന് പേരുടെ മരണത്തില് പ്രതിയ്ക്ക് ഉത്തരവാദിത്തമുണ്ടെന്ന നിഗമനത്തില് കൊലപാതകകുറ്റം ഐ പി സി 302-ാം വകുപ്പ് അന്വഷണത്തിന്റെ രണ്ടാം ഘട്ടത്തില് ചുമത്തി.
എന്നാല് രണ്ടാം ഘട്ടത്തിലും യുഎപിഎ ചുമത്തുന്നതില് അന്വേഷണ സംഘം തീരുമാനമെടുത്തിരുന്നില്ല. ചോദ്യം ചെയ്യല് ഒമ്പതാംദിവസം എത്തിയപ്പോഴാണ് യുഎപിഎ 16-ാം വകുപ്പ് ഷാറൂഖില് ചുമത്തിയത്. ഇതോടെയാണ് കേസ് എന്ഐഎ ഏറ്റെടുക്കുന്നതിനുള്ള സാഹചര്യം വര്ദ്ധിച്ചിരിക്കുന്നത്. ആക്രമണം നടന്നതിന് ശേഷം കേരളത്തിലെത്തിയ അന്വേഷണ സംഘം വിവരങ്ങള് ശേഖരിക്കുകയും പ്രാഥമിക റിപ്പോര്ട്ട് സമര്പ്പിക്കുകയും ചെയ്തിരുന്നു. പ്രതിയുടെ തീവ്രവാദ ബന്ധം തള്ളാതെയുള്ള റിപ്പോര്ട്ടായിരുന്നു എന്ഐഎ സമര്പ്പിച്ചത്. പ്രതി ഷാറൂഖ് സെയ്ഫിയുടെ കസ്റ്റഡി കാലാവധി നാളെ അവസാനിക്കുന്നതിനോടൊപ്പം തന്നെ പ്രതിക്കായി ഡിഫന്സ് കൗണ്സില് സമര്പ്പിച്ച ജാമ്യാപേക്ഷയും 18-ന് കോടതി പരിഗണിക്കും.
