ചണ്ഡിഗഢ്: പൂഞ്ചിൽ വീരമൃത്യുവരിച്ച യുവ സൈനികൻ സേവക് സിംഗിന്റെ വീര സ്മരണകളിൽ കണ്ണീരണിഞ്ഞ് പഞ്ചാബിലെ ബാഗാ ഗ്രാമം. കഴിഞ്ഞ ദിവസം ജമ്മു കശ്മീരിലെ പൂഞ്ചിലുണ്ടായ ഭീകരാക്രമണത്തിൽ വീരമൃത്യു വരിച്ച ഏറ്റവും പ്രായം കുറഞ്ഞ സൈനികനാണ് സേവക് സിംഗ്. 23 വയസ് മാത്രമായിരുന്നു ധീരജവാന്റെ പ്രായം.
2018 ലാണ് സേവക് സിംഗ് സൈന്യത്തിൽ ചേർന്നത്. ബാഗ ഗ്രാമത്തിലെ പാവപ്പെട്ട കർഷകനായ ഗുരുചരൺ സിംഗിന്റെ മകനായ ഇദ്ദേഹത്തിന് രണ്ട് സഹോദരിമാരാണ് ഉള്ളത്. സ്വന്തമായി ഭൂമി ചോലും ഇല്ലാത്ത ഗുരുചരൺ സിംഗ് മറ്റുള്ളവരുടെ പാടങ്ങളിൽ ജോലി ചെയ്താണ് മക്കളെ വളർത്തിയത്. മക്കളിൽ എറ്റവും ഇളയാളായിരുന്ന് സേവക് സിംഗ്.
ഒന്നര മാസം മുൻപ് അവധിയെടുത്ത് സേവക് സിംഗ് ഗ്രാമത്തിലെത്തിയിരുന്നു. ഊർജ്ജസ്വലനും സന്തോഷവാനുമായ യുവാവായിരുന്നു സേവക് എന്ന് ഗ്രാമ മുഖ്യൻ ഓർമ്മിച്ചു. സൈന്യത്തിൽ ചേരാൻ ആഗ്രഹിക്കുന്ന യുവാക്കൾക്ക് വേണ്ട ഉപദേശങ്ങൾ നൽകാൻ എന്നും മുന്നിലുണ്ടായിരുന്നു. മികച്ച സൈനികനാകാൻ ശാരീരികവും മാനസീകവുമായി എത് രീതിയിൽ തയ്യാറെടുക്കണമെന്നത് സംബന്ധിച്ച മാർഗ്ഗനിർദ്ദേശങ്ങളും സേവക് സിംഗ് നൽകിയിരുന്നു. സേവക് സിംഗിൽ നിന്ന പ്രചോദനം ഉൾക്കൊണ്ട് മൂന്ന് യുവാക്കൾ മാസങ്ങൾക്ക് മുൻപ് ഇന്ത്യൻ സേനയുടെ ഭാഗമായതായും ഗ്രാമ മുഖ്യൻ കൂട്ടിച്ചേർത്തു.
