അക്കൗണ്ടിൽ ഒരു മില്യൺ ഫോളോവേഴ്സിൽ അധികമുള്ള ഹാൻഡിലുകൾക്ക് ബ്ലൂടിക്ക് തിരികെ നൽകി ട്വിറ്റർ. പണം നൽകാത്ത എല്ലാവരുടെയും ബ്ലൂ ടിക്ക് നീക്കം ചെയ്തതിന് പിന്നാലെയാണ് ട്വിറ്ററിന്റെ നയമാറ്റം. ബോളിവുഡ് നടൻ ഷാരൂഖ് ഖാൻ, ക്രിക്കറ്റ് താരം വിരാട് കോഹ്ലി എന്നിവർക്ക് മുതൽ മുടക്കില്ലാതെ ബ്ലൂടിക്ക് തിരികെ ലഭിച്ചു.
ഷാരൂഖ് ഖാൻ, ആലിയ ഭട്ട്, വിരാട് കോഹ്ലി, സൽമാൻ ഖാൻ, പ്രിയങ്ക ചോപ്ര, ദീപിക പദുക്കോൺ, ഋതിക് റോഷൻ എന്നീ താരങ്ങൾക്കാണ് ബ്ലൂടിക് തിരികെ നൽകിയിരിക്കുന്നത്. അതേസമയം താൻ പണം നൽകി ബ്ലൂടിക് വാങ്ങിയിരുന്നുവെന്ന് ബോളിവുഡ് താരം അമിതാഭ് ബച്ചൻ വെളിപ്പെടുത്തിയിരുന്നു. മലയാള താരങ്ങളായ മമ്മൂട്ടിയുടെയും മോഹൻലാലിന്റെയും മുഖ്യമന്ത്രി പിണറായി വിജയന്റെയുമൊക്കെ ട്വിറ്റർ ഹാൻഡിലുകളിൽ ബ്ലൂടിക് തിരികെ ലഭിച്ചിട്ടുണ്ട്. ഇവരൊക്കെ സബ്സ്ക്രിപ്ഷൻ ഫീസ് നൽകിയിരുന്നോ എന്ന കാര്യത്തിൽ ഇതുവരെ വ്യക്തതയില്ല. ഇവർക്കെല്ലാം ഒരു മില്യൺ ഫോളോവേഴ്സിൽ അധികമുള്ളതിനാൽ തന്നെ പണം നൽകാതെയാകാം ബ്ലൂ ടിക്കുകൾ തിരികെ ലഭിച്ചത് എന്നാണ് വിവരം.
ഏപ്രിൽ 20-നാണ് ട്വിറ്റർ ബ്ലൂടിക്കുകൾ ഒഴിവാക്കിയത്. ബ്ലൂ ടിക്ക് നേടുന്നതിനായി ഓരോ സ്ഥലങ്ങളിൽ താമസിക്കുന്നവരും വ്യത്യസ്ത തുകയാണ് അടയ്ക്കേണ്ടി വരിക. അമേരിക്കയിലെ ആൻഡ്രോയിഡ് ഉപയോക്താക്കൾ പ്രതിമാസം 11 ഡോളർ അഥവാ 900 ഇന്ത്യൻ രൂപയാണ് ബ്ലൂടിക്കാനായി മുടക്കേണ്ടിയിരുന്നത്. ട്വിറ്റർ ബ്ലൂടിക്ക് സ്വന്തമാക്കുന്നതിലൂടെ ട്വീറ്റുകൾ എഡിറ്റ് ചെയ്യാനും ഒപ്പം 1080 പിക്സൽ വീഡിയോകൾ അപ്ലോഡ് ചെയ്യുവാനും സാധിക്കും. നീല ടിക്ക് പ്രൊഫൈലിലെ പേരിനൊപ്പം ഉണ്ടായിരുന്നു.
Comments