മാളികപ്പുറം സിനിമയിലെ വില്ലനായി വേഷമിട്ട സമ്പത്ത് റാം പ്രധാന വേഷത്തെ അവതരിപ്പിക്കുന്ന ചിത്രമൊരുങ്ങുന്നു. ആപ്പിൾ ട്രീ സിനിമാസിന്റെ ബാനറിൽ സജിൻ ലാൽ സംവിധാനം നിർവഹിക്കുന്ന ചിത്രമായ ഭാഗ്യലക്ഷ്മിയിലൂടെയാണ് താരം പ്രധാനകഥാപാത്രമായി അവതരിക്കുന്നത്. ഇപ്പൊഴിതാ ചിത്രത്തിന്റെ അണിയറപ്രവർത്തകർ ഇൻട്രൊഡക്ഷൻ പോസ്റ്റർ പുറത്തുവിട്ടിരിക്കുകായാണ്. കെ സ്റ്റുഡിയോസിന്റെ സഹബാനറിൽ ഒരുങ്ങുന്ന ചിത്രത്തിന്റെ തിരക്കഥയും സംഭാഷണവും ഒരുക്കിയിരിക്കുന്നത് മാദ്ധ്യമ പ്രവർത്തകനായ ബാബു വെളപ്പായ ആണ്. ക്രയോൺസ്, താങ്ക് യൂ വെരി മച്ച്, ഹന്ന എന്നീ ചിത്രങ്ങൾക്ക് ശേഷം സജിൻ ലാൽ സംവിധാനം നിർവഹിക്കുന്ന ചിത്രം കൂടിയാണിത്.
ഒരമ്മയുടേയും മകളുടെയും അതിതീവ്രമായ ആത്മബന്ധത്തിന്റെ കഥയാണ് ചിത്രത്തിന്റെ ഇതിവൃത്തം. വർത്തമാനകാലത്തെ പൊള്ളുന്ന ജീവിതാനുഭവങ്ങളും വനിതകളുടെ അതിജീവനവുമാണ് ചിത്രത്തിന്റെ കാതൽ. ഉമ്മർ കോയ എന്ന സ്കൂൾ ഹെഡ്മാസ്റ്ററായാണ് സമ്പത്ത് റാം ചിത്രത്തിൽ എത്തുന്നത്. മെയ് മാസത്തിൽ ചിത്രീകരണം ആരംഭിക്കുന്ന ചിത്രത്തിന്റെ പ്രധാന ലൊക്കേഷൻ കൊല്ലം മൺറോതുരുത്തും സമീപ പ്രദേശങ്ങളുമാണ്.
സംഗീതത്തിന് പ്രാധാന്യമുള്ള ചിത്രത്തിൽ കൈതപ്രം ദാമോദരൻ നമ്പൂതിരി, ബാബു കിരിയത്ത്, സജിൻ ലാൽ എന്നിവരുടെ വരികൾക്ക് സംഗീതം പകർന്നിരിക്കുന്നത് മണക്കാല ഗോപാലകൃഷ്ണൻ,രാഹുൽ ബി അശോക് എന്നിവരാണ്. സമ്പത്ത് റാം, സേതുലക്ഷ്മി എന്നിവർ കേന്ദ്രകഥാപാത്രങ്ങളായി എത്തുന്ന ചിത്രത്തിൽ താരനിർണ്ണയം പൂർത്തിയായി വരികയാണ്.
സുരേന്ദ്രൻ വലിയപറമ്പിൽ, അഡ്വ: ബിന്ദു, മനോജ് രാധാകൃഷ്ണൻ എന്നിവരാണ് എക്സിക്യൂട്ടീവ് പ്രൊഡ്യൂസർമാർ. ജോഷ്വാ റൊണാൾഡ് ഛായാഗ്രഹണം നിർവഹിക്കുന്ന ചിത്രത്തിന്റെ ചിത്രസംയോജനം രഞ്ജിത് ആർ നിർവഹിക്കുന്നു. പി. ശിവപ്രസാദ് ആണ് പ്രൊജക്റ്റ് ഡിസൈനർ.
പ്രൊഡക്ഷൻ കൺട്രോളർ: ദാസ് വടക്കഞ്ചേരി, ആർട്ട്: സുജീർ കെ.ടി., മേക്കപ്പ്: ഒക്കൽ ദാസ്, വസ്ത്രലങ്കാരം: റാണാ പ്രതാപ്, പി.ആർ.ഒ.: പി.ശിവപ്രസാദ്, ഹരീഷ് എ.വി., മാർക്കറ്റിംങ്: ബിസി ക്രിയേറ്റീവ്സ്, സ്റ്റിൽസ്: വിവേക് കോവളം.
