ഡെറാഡൂൺ: ഇന്ത്യയിലെ അവസാന ഗ്രാമം എന്ന പേരു മായ്ച്ച് ഉത്തരാഖണ്ഡിലെ മനാ ഗ്രാമം. രാജ്യത്തെ ആദ്യ ഗ്രാമമെന്ന് ഖ്യാതി കൊച്ചുഗ്രാമത്തിന് സ്വന്തമായി. പ്രധാനമന്ത്രി നരേന്ദ്രമോദിയുടെ നിർദ്ദേശ പ്രകാരമാണ് നടപടി. ഇത് സംബന്ധിച്ച സൂചന ബോർഡുകൾ ഔദ്യോഗികമായി സ്ഥാപിച്ചു. ബോർഡർ റോഡ് ഓർഗനൈസേഷന്റെ നേതൃത്വത്തിലാണ് കമാനങ്ങൾ സ്ഥാപിച്ചത്.
ഇന്ത്യ-ചൈന അതിർത്തിയിലെ ചമോലി ജില്ലയിലാണ് ഗ്രാമം സ്ഥിതിചെയ്യുന്നത്. കഴിഞ്ഞ വർഷം പ്രധാനമന്ത്രി ചമോലി ജില്ലയിൽ എത്തിയിരുന്നു. സന്ദർശന വേളയിലാണ് അതിർത്തി ഗ്രാമങ്ങൾക്ക് ആദ്യ ഗ്രാമങ്ങൾ എന്ന പേരുമാറ്റം നിർദ്ദേശിച്ചത്.
സാധാരണയായി അതിർത്തി ഗ്രാമങ്ങളെ രാജ്യത്തെ അവസാന ഗ്രാമങ്ങളായാണ് വിളിക്കപ്പെടുന്നത്. ഇതിന് മാറ്റം ആവശ്യമാണെന്ന് പ്രധാനമന്ത്രി കഴിഞ്ഞ സന്ദർശനവേളയിൽ പറഞ്ഞിരുന്നു. ഇതിന്റെ അടിസ്ഥാനത്തിലാണ് മാറ്റം ഉണ്ടായതെന്ന് ഉത്തരാഖണ്ഡ് മുഖ്യമന്ത്രി പുഷ്കർസിംഗ് ധാമി പറഞ്ഞു. അതിർത്തി പ്രദേശങ്ങളുടെ വികസനത്തിന് കേന്ദ്രസർക്കാർ പ്രഥമ പരിഗണനയാണ് നൽകുന്നത് .നിരവധി ഗ്രാമ വികസന പദ്ധതികളാണ് അതിർത്തി പ്രദേശങ്ങളിൽ നടപ്പിലാക്കുന്നത്, അദ്ദേഹം കൂട്ടിച്ചേർത്തു.
പുണ്യ സ്ഥലമായ ബദരീനാഥ് സ്ഥിതിചെയ്യുന്നത് മനാ ഗ്രാമത്തിന് സമീപത്താണ്. ഹിമാലയത്തിലെ ക്ഷേത്രങ്ങളിൽ എത്തുന്ന തീർത്ഥാടകർ അവസാന ഗ്രാമം എന്ന് നിലയിലിൽ മനാ ഗ്രാമത്തിലും എത്താറുണ്ട്.
