പ്ലേ സ്റ്റോറിൽ നിന്ന് 3,500 ലോൺ ആപ്പുകൾ നീക്കം ചെയത് ഗൂഗിൾ. ഗൂഗിളിന്റെ പോളിസികൾ പാലിക്കാത്ത ലോൺ ആപ്പുകളാണ് നീക്കം ചെയ്തിരിക്കുന്നത്. നീക്കം ചെയ്ത ആപ്പുകൾ ഉപയോക്താക്കളുടെ അനുവാദമില്ലാതെ ഫോട്ടോകളും കോൺടാക്ടുകളും ചോർത്തുന്നതായി ഗൂഗിൾ കണ്ടെത്തിയിരുന്നു.
വ്യക്തിഗത ലോൺ ആപ്പുകൾക്ക് ഫോട്ടോ, കോണ്ടാക്ട് തുടങ്ങിയ സെൻസിറ്റീവ് ഡേറ്റകൾ കൈക്കലാക്കാതിരിക്കാൻ ഗൂഗിൾ ലോൺ പോളിസികൾ പുതുക്കിയിട്ടുണ്ട്. വ്യാജ ലോൺ ആപ്പുകളിലൂടെ പണം തട്ടിയ കേസിൽ 14 പ്രതികളെ മുംബൈ സൈബർ പോലീസ് പിടികൂടിയിരുന്നു. ഇതിന് പിന്നാലെയാണ് നടപടി.
നിരവധി ആളുകളിൽ നിന്നായി തട്ടിയെടുത്ത 350 കോടി രൂപ ക്രിപ്റ്റോകറൻസിയാക്കി മാറ്റിയതിന് ശേഷം വിദേശത്തേക്ക് കടത്തുകയാണ് തട്ടിപ്പുകാർ ചെയ്തത്. 2021 മാർച്ച് 31-നും 2023-നും മദ്ധ്യേ മുംബൈ പോലീസ് 176 വ്യാജ ലോൺ തട്ടിപ്പ് കേസുകളാണ് രജിസ്റ്റർ ചെയ്തിട്ടുള്ളത്. ഇവയിൽ കേസുമായി ബന്ധപ്പെട്ട് 70 അറസ്റ്റുകളും രേഖപ്പെടുത്തിയിട്ടുണ്ട്. ഇന്ത്യയിലെ ഇത്തരം തട്ടിപ്പുകൾ തടയുന്നതിനായി പുതിയ ലൈസൻസ് മാനദണ്ഡങ്ങൾ നിഷ്കർശിച്ചിരിക്കുകയാണ് ഗൂഗിൾ.
