ബോളിവുഡ് താരം സൽമാൻ ഖാന് നേരെയുണ്ടായ വധ ഭീഷണിയിൽ പ്രതികരിച്ച് നടി കങ്കണ റണാവത്ത്. രാജ്യം സുരക്ഷിതമായ കരങ്ങളിലാണെന്നും സുരക്ഷയിൽ ആശങ്ക വേണ്ടെന്നും താരം പറഞ്ഞു. കഴിഞ്ഞ ദിവസം ഒരു ടെലിവിഷൻ പരിപാടിക്കിടയിൽ തന്റെ സുരക്ഷയെക്കുറിച്ച് സൽമാൻ ഖാൻ ആശങ്ക പ്രകടിപ്പിച്ചിരുന്നു. ഇതിന് മറുപടിയുമായാണ് താരം രംഗത്തുവന്നിരിക്കുന്നത്.
‘ഞങ്ങൾ അഭിനേതാക്കളാണ്. സൽമാൻ ഖാന് കേന്ദ്രം സുരക്ഷയൊരുക്കുന്നുണ്ട്. പ്രധാനമന്ത്രി നരേന്ദ്രമോദിയിൽ നിന്നും ആഭ്യന്തര മന്ത്രി അമിത് ഷായിൽ നിന്നും അദ്ദേഹത്തിന് സംരക്ഷണം ലഭിക്കുന്നുണ്ട്. അതുകൊണ്ട് ഒന്നും പേടിക്കേണ്ടതില്ല. എനിയ്ക്ക് നേരെ ഭീഷണി ഉണ്ടായപ്പോൾ സർക്കാർ എനിയ്ക്കും സുരക്ഷയൊരുക്കിയിരുന്നു. ഇന്ന് രാജ്യം സുരക്ഷിതമായ കരങ്ങളിലാണ്, അതെക്കുറിച്ച് ആശങ്ക വേണ്ട’-കങ്കണ പറഞ്ഞു.
വധഭീഷണിയുള്ള സൽമാൻഖാന് വൈ പ്ലസ് കാറ്റഗറി സുരക്ഷയാണ് മുംബൈ പോലീസ് ഒരുക്കിയിരിക്കുന്നത്. ശനിയാഴ്ചയാണ് തന്റെ സുരക്ഷയെക്കുറിച്ചുള്ള ആശങ്കയും അനുഭവങ്ങളും സൽമാൻ ഖാൻ തുറന്ന് പറഞ്ഞത്.
