തിരുവനന്തപുരം: ക്രൈസ്തവ സമുദായത്തെ വ്രണപ്പെടുത്തുന്ന കക്കുകളി നാടകം നിരോധിക്കണമെന്ന് യുഡിഎഫ്. കേരള സ്റ്റോറിയ്ക്ക് പ്രദർശനാനുമതി നൽകരുതെന്നും യുഡിഎഫ് കൺവീനർ എംഎം ഹസൻ പറഞ്ഞു. മതസൗഹാർദ്ദം തകർക്കുന്ന സിനിമയ്ക്കെതിരെ കേസെടുക്കാനും ഹസൻ ആവശ്യപ്പെട്ടു.
കേരള സ്റ്റോറിയുടെ പ്രദർശനം കേരളത്തിൽ നിരോധിക്കണം. ആവിഷ്കാര സ്വാതന്ത്ര്യം എന്ന് പറയുന്നത് ഏതെങ്കിലും ഒരു മതവിഭാഗത്തിന്റെ വികാരങ്ങൾ വ്രണപ്പെടുത്തുകയോ നാട്ടിൽ നിലനിൽക്കുന്ന മതസൗഹാർദ്ദം തകർക്കുകയോ ചെയ്യുന്നതല്ല. സമതസൗഹാർദ്ദം തകർക്കുന്ന തരത്തിലുള്ള ആവിഷ്കാര സ്വാതന്ത്ര്യം സർക്കാർ ഒരിക്കലും അനുവദിച്ച് കൊടുക്കരുതെന്നും എംഎം ഹസൻ ആവശ്യപ്പെട്ടു.
ഐഎസ് ഭീകരതയുടെ തീവ്രത എടുത്തുകാണിക്കുന്ന ചിത്രമായ കേരള സ്റ്റോറിയുടെ ലക്ഷ്യം കേരള വിരുദ്ധത പ്രചരിപ്പിക്കല്ലെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ അഭിപ്രായപ്പെട്ടു. മത നിരപേക്ഷത തകർക്കാനുള്ള ഇത്തരം നീക്കങ്ങൾക്കെതിരെ ജനങ്ങളാണ് പ്രതികരിക്കേണ്ടതെന്ന് അദ്ദേഹം പറഞ്ഞു. മതത്തേയും വിശ്വാസ പ്രമാണങ്ങളെയും പരസ്യമായി എതിർക്കുന്ന നിലപാട് സിപിഎമ്മിനില്ലെന്നും അദ്ദേഹം പറഞ്ഞു. ദി കേരള സ്റ്റോറിയെ നിരോധിക്കുമെന്ന ആവശ്യം ഉന്നയിക്കുന്നില്ലെന്നും തീരുമാനം എടുക്കേണ്ടത് സർക്കാരാണെന്നും അദ്ദേഹം കൂട്ടിച്ചേർത്തു.
Comments