ലണ്ടൻ: കിരീടധാരണത്തിനൊരുങ്ങുന്ന ചാൾസ് മൂന്നാമൻ രാജാവിന് ആശംസകൾ അറിയിച്ച് ഉപരാഷ്ട്രപതി ജഗ്ദീപ് ധൻഖർ. ശനിയാഴ്ച ലണ്ടനിൽ നടക്കുന്ന ചടങ്ങിന് മുന്നോടിയായി ഇരുവരും കൂടിക്കാഴ്ച നടത്തി. ഇന്ത്യ-യുകെ രാജ്യങ്ങളുടെ തന്ത്രപരമായ പങ്കാളിത്തം കൂടുതൽ ശക്തിപ്പെടുത്തുമെന്ന് വിദേശകാര്യമന്ത്രാലയ വക്താവ് അരിന്ദം ബാഗ്ചി ട്വിറ്ററിൽ കുറിച്ചു.
കിരീടധാരണ ചടങ്ങിൽ പങ്കെടുക്കാൻ രാജ്യത്തെ പ്രതിനിധീകരിച്ച് ഉപരാഷ്ട്രപതി ദ്വിദിന സന്ദർശനത്തിലാണ്. വെസ്റ്റമിൻസ്റ്റർ ആബിയിൽ നടക്കുന്ന ചടങ്ങിൽ ചാൾസ് മൂന്നാമൻ ഭാര്യ കാമിലയ്ക്കൊപ്പമാകും എത്തുക. പാരമ്പര്യങ്ങൾ പലതും തിരുത്തി കാലഘട്ടത്തിനുസരിച്ചുള്ള പരിഷ്കാരങ്ങൾ ഉൾപ്പെടുത്തിയാണ് ചാൾസ് മൂന്നാമൻ രാജാവിന്റെ കിരീടധാരണം.
VP Jagdeep Dhankhar @VPIndia met with H.M. King Charles III and conveyed greetings on the occasion of his Coronation.
VP reaffirmed commitment to further strengthen the 🇮🇳-🇬🇧 Comprehensive Strategic Partnership. pic.twitter.com/qhpS1L2Kvp
— Arindam Bagchi (@MEAIndia) May 5, 2023
രാവിലെ ആറ് മുതൽ ഉച്ചകഴിഞ്ഞ് 2.30 വരെ നീളുന്ന ചടങ്ങാണ് സംഘടിപ്പിക്കുന്നത്. 1066 മുതലുള്ള രാജകുടുംബത്തിന്റെ ചരിത്രത്തിലെ 40-ാമത്തെ കിരീടധാരണമാണ് ശനിയാഴ്ച നടക്കുന്നത്. രാവിലെ ആറിന് റോയൽ പരേഡിനുള്ള ഒരുക്കങ്ങൾ ബക്കിംങാം കൊട്ടാരത്തിൽ ആരംഭിക്കും. രാവിലെ മുതൽ തന്നെ പരേഡ് വീക്ഷിക്കാൻ രാജവീഥിയുടെ ഇരുവശങ്ങളിലും സ്ഥാനം പിടിക്കും. ആദ്യം എത്തുന്നവർക്ക് അവസരം എന്നതാകും ഇതിന്റെ മാനദണ്ഡം. മറ്റുള്ളവരെ പബ്ലിക് സ്ക്രീനിംഗ് സജ്ജമാക്കിയിട്ടുള്ള ഹൈഡ് പാർക്ക്, ഗ്രീൻ പാർക്ക്, സെന്റ് ജെയിംസ് പാർക്ക് എന്നിവിടങ്ങളിലേക്ക് തിരിച്ചുവിടും.
