ഗാന്ധിനഗർ: ഗുജറാത്തിൽ 4400 കോടി രൂപയുടെ വികസന പദ്ധതികൾക്ക് പ്രധാനമന്ത്രി നരേന്ദ്രമോദി നാളെ തുടക്കം കുറിക്കും. ഗാന്ധിനഗറിൽ നടക്കുന്ന പരിപാടിയിൽ 2,450 കോടിയുടെ വികസന പദ്ധതികളുടെ ഉദ്ഘാടനവും തറക്കല്ലിടലും പ്രധാനമന്ത്രി നിർവഹിക്കും. നഗരവികസന വകുപ്പ്, ജലവിതരണ വകുപ്പ് തുടങ്ങിയ നിരവധി പദ്ധതികളാണ് പ്രധാനമന്ത്രി നാളെ ഉദ്ഘാടനം നിർവഹിക്കുക.
19,000 പൗരന്മാർക്ക് കേന്ദ്ര സർക്കാരിന്റെ ഭവന പദ്ധതി പ്രകാരം നിർമ്മിച്ച വീടുകൾ നൽകുന്നതിനായി പ്രധാനമന്ത്രി ഗുജറാത്ത് സന്ദർശിക്കും. ഗതാഗത വകുപ്പ്, മൈൻസ് ആൻഡ് മിനറൽ വകുപ്പ് എന്നിവയും വികസന പദ്ധതികളിൾ ഉൾപ്പെടുന്നു. ഗാന്ധിനഗറിൽ നടക്കുന്ന അഖില ഭാരതീയ ശിക്ഷാ സംഘ അധികാർ പരിപാടിയിൽ അദ്ദേഹം പങ്കെടുക്കും. കൂടാതെ ഗിഫ്റ്റ് സിറ്റി സന്ദർശിക്കുമെന്നും ഉന്നതവൃത്തങ്ങൾ അറിയിച്ചു.
പ്രധാനമന്ത്രി ആവാസ് യോജന പദ്ധതിയുടെ ഗുണഭോക്താക്കൾക്ക് പ്രധാനമന്ത്രി താക്കോൽ കൈമാറും. ഗുജറാത്ത് ഇന്റർനാഷണൽ ഫിനാൻസ് ടെക്-സിറ്റി സന്ദർശിക്കുന്ന വേളയിൽ അദ്ദേഹം വിവിധ പദ്ധതികളുടെ സ്ഥിതിഗതികൾ അവലോകനം ചെയ്യും. ഓൾ ഇന്ത്യ പ്രൈമറി ടീച്ചേഴ്സ് ഫെഡറേഷന്റെ 29-ാമത് ദ്വിവത്സര സമ്മേളനമാണ് ‘അഖില ഭാരതീയ ശിക്ഷാ സംഘ് അധികാർ്’.
