ബെംഗളുരു: മുന്നണി രൂപീകരിക്കാനായി തന്നെ ഒരു പാർട്ടിയും സമീപിച്ചിട്ടില്ലെന്ന് ജെഡിഎസ് നേതാവ് എച്ച്ഡി കുമാരസ്വാമി. തങ്ങളുടേത് ഒരു ചെറിയപാർട്ടിയാണെന്നും എല്ലാം ജനങ്ങളാണ് തീരുമാനിക്കുന്നതെന്നും കുമാര സ്വാമി പറഞ്ഞു. സിംഗപ്പൂരിൽ നിന്നും മടങ്ങിയെത്തിയ ശേഷം മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം.
ജനാതാ ദൾ കിംഗ് മേക്കർ അല്ലെന്നും കിംഗ് ആണെന്നായിരുന്നു കുമാരസ്വാമിയുടെ കഴിഞ്ഞ ദിവസത്തെ പ്രതികരണം. എക്‌സിറ്റ് പോൾ ഫലങ്ങളിൽ വിശ്വസിക്കുന്നില്ലെന്നും അദ്ദേഹം പറഞ്ഞിരുന്നു. ഓൾഡ് മൈസൂർ മേഖലയിലാണ് ജെഡിഎസ് പ്രതീക്ഷ അർപ്പിക്കുന്നത്.
തിരഞ്ഞെടുപ്പിലെ ആദ്യഫലസൂചകൾ പുറത്തുവരുമ്പോൾ ബിജെപി മുന്നിൽ നിൽക്കുന്ന കാഴ്ചകളാണ് കാണുന്നത്. 134 സീറ്റുകളുടെ ഫലം പുറത്തുവരുമ്പോൾ 62 സീറ്റുകളോടെ ബിജെപിയാണ് ലീഡ് ചെയ്യുന്നത്. 60 സീറ്റുകളിൽ കോൺഗ്രസും 12 സീറ്റുകളിൽ ജെഡിഎസും ലീഡ് ചെയ്യുന്നു.
