ചരിത്ര വിജയം സ്വന്തമാക്കി ആദാ ശർമ നായികയായ ചിത്രം കേരള സ്റ്റോറി. റിലീസ് ചെയ്ത് ഒമ്പത് ദിവസം കൊണ്ട് ചിത്രം 100 കോടി ക്ലബ്ബിലെത്തി. ഇതോടെ 2023-ലെ ഏറ്റവും കൂടുതൽ വരുമാനം നേടുന്ന രണ്ടാമത്തെ ചിത്രമായി സുദീപ്തോ സെന്നിന്റെ കേരള സ്റ്റോറി മാറി.
.ഇന്നലെ മാത്രം ചിത്രം നേടിയത് 19.50 കോടി രൂപയാണ്. ഇതുവരെ സ്വന്തമാക്കിയത് 112.87 കോടി രൂപയാണ്. യാഥാർത്ഥമായ സംഭവങ്ങളെ ആസ്പദമാക്കി ചിത്രീകരിക്കുന്ന സിനിമയാണ് കേരള സ്റ്റോറി. നിഷ്കളങ്കരായ മൂന്ന മലയാളി പെൺകുട്ടികളെ ഐഎസിന്റെ കാണാപ്പുറങ്ങളിലെത്തിക്കുന്നതും അവരെ ഭീകര സംഘടനയുടെ ഭാഗമാക്കുന്നതുമാണ് ചിത്രത്തിന്റെ ഇതിവൃത്തം.
ഇന്ത്യയ്ക്ക് പുറമേ ചിത്രം അമേരിക്കയിലും കാനഡയിലുമെത്തി. ഇരു രാജ്യങ്ങളിലുമായി 200 സ്ക്രീനുകളിലായാണ് ചിത്രം പ്രദർശനത്തിനെത്തിയത്. സർഗാത്മക അതിർവരമ്പുകൾക്കപ്പുറമാണ് സിനിമയുടെ ദൗത്യമെന്ന് സംവിധായകൻ സുദീപ്തോ സെൻ വ്യക്തമാക്കിയിരുന്നു. ഭീകരവാദത്തെ മറയില്ലാതെ അവതരിപ്പിച്ച ചിത്രത്തിനെതിരെ കോൺഗ്രസും സിപിഎമ്മിം അടക്കമുള്ള രാഷ്ട്രീയ പാർട്ടികൾ രൂക്ഷവിമർശനവുമായി രംഗത്തെത്തിയിരുന്നു. ചിത്രം കേരളത്തെ അപകീർത്തിപ്പെടുത്തുകയാണെന്നായിരുന്നു ഇവരുടെ പരാതി.
