സുരേഷ് ഗോപി, ബിജു മേനോന് എന്നിവര് കേന്ദ്ര കഥാപാത്രങ്ങളെ അവതരിപ്പിക്കുന്ന ഗരുഡന് എന്ന സിനിമയുടെ ചിത്രീകരണം കൊച്ചിയില് വെള്ളിയാഴ്ച ആരംഭിച്ചിരുന്നു. ലീഗല് ത്രില്ലര് വിഭാഗത്തില് പെടുന്ന ഈ ചിത്രം സംവിധാനം ചെയ്യുന്നത് നവാഗതനായ അരുണ് വര്മ്മയാണ്. മാജിക്ക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ നിർമ്മിക്കുന്ന ചിത്രത്തിൽ സുരേഷ് ഗോപി ജോയിന്റ് ചെയ്തു.
ചിത്രത്തിന്റെ ഷൂട്ടിംഗിന് സുരേഷ് ഗോപി എത്തിയ ചിത്രങ്ങള് സമൂഹമാദ്ധ്യമങ്ങളിൽ ശ്രദ്ധ നേടുകയാണ്. സുരേഷ് ഗോപിയുടെ മറ്റൊരു മാസ് കഥാപാത്രത്തിനായി കാത്തിരിക്കുകയാണ് ആരാധകർ. വെള്ളിയാഴ്ച നടന്ന ചിത്രത്തിന്റെ പൂജയില് അണിയറപ്രവർത്തകരും അഭിനേതാക്കളും പങ്കെടുത്തുത്തിരുന്നു. സംവിധായകൻ അരുൺ വർമ്മയുടെ ഗുരു കൂടിയായ മേജർ രവിയാണ് ആദ്യ ഭദ്രദീപം തെളിച്ചത്.
അഭിരാമി, ലിസ്റ്റിൻ സ്റ്റീഫൻ, വിനയ് ഗോവിന്ദ്, തലൈവാസൽ വിജയ്, മിഥുൻ മാനുവൽ തോമസ്, അരുൺ വർമ്മ എന്നിവർ ഭദ്രദീപം തെളിക്കൽ ചടങ്ങ് പൂർത്തീകരിച്ചു. നിയമത്തിന്റെ പോരാട്ടം രണ്ടു പ്രധാന കഥാപാത്രങ്ങളിലൂടെ ഉദ്വേഗഭരിതമായി അവതരിപ്പിക്കാനൊരുങ്ങുകയാണ് സംവിധായകൻ അരുൺ വർമ്മ.
ഒരിടവേളയ്ക്കു ശേഷം സുരേഷ് ഗോപി- ബിജു മേനോൻ കൂട്ടുക്കെട്ട് ഒന്നിക്കുന്നു എന്നതും അഞ്ചാം പാതിരയ്ക്ക് ശേഷം മിഥുൻ മാനുവൽ തോമസ് ഒരുക്കുന്ന ത്രില്ലർ എന്ന നിലയിലുമാണ് ഗരുഡൻ ശ്രദ്ധ നേടുന്നത്. സിദ്ദിഖ്, ദിലീഷ് പോത്തൻ, ജഗദീഷ്, മേജർ രവി, നിഷാന്ത് സാഗർ, ജയ്സ് ജോസ്, രഞ്ജിത്ത് കങ്കോൾ, രഞ്ജിനി, മാളവിക എന്നിവരും ഈ ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.
