രണ്ടായിരം രൂപ നോട്ടുകൾക്ക് നിയന്ത്രണം ഏർപ്പെടുത്തി ആർബിഐ; കൈവശമുള്ള നോട്ടുകൾ പുറത്തിറക്കേണ്ടെന്ന് ബാങ്കുകൾക്ക് നിർദ്ദേശം; വിനിമയം നടത്തുന്നതിന് തടസമില്ല

ന്യൂഡൽഹി: രണ്ടായിരം രൂപയുടെ കറൻസി വിതരണത്തിന് നിയന്ത്രണം ഏർപ്പെടുത്തി ആർബിഐ. എല്ലാ ബാങ്കുകൾക്കും ഇത് സംബന്ധിച്ച നിർദേശം റിസർവ് ബാങ്ക് ഓഫ് ഇന്ത്യ നൽകിയിട്ടുണ്ട്. അതേസമയം ജനങ്ങളുടെ കൈവശമുള്ള രണ്ടായിരത്തിന്റെ നോട്ടുകൾ ഉപയോഗിക്കുന്നതിന് തടസമില്ലെന്ന് ആർബിഐ വ്യക്തമാക്കി. നിലവിലുള്ള രണ്ടായിരം രൂപയുടെ നോട്ടുകൾക്ക് മൂല്യമുണ്ടാകുമെന്നും ജനങ്ങളുടെ പക്കലുള്ള രണ്ടായിരത്തിന്റെ നോട്ടുകൾ ബാങ്കുകൾക്ക് കൈമാറാൻ മെയ് 23 മുതൽ സെപ്റ്റംബർ 30 വരെ സമയമുണ്ടെന്നും ആർബിഐ അറിയിച്ചു. ഒറ്റത്തവണ 20,000 രൂപ വരെ ഇത്തരത്തിൽ ബാങ്കുകൾക്ക് കൈമാറാം. പുതിയ നിർദേശപ്രകാരം 2023 സെപ്റ്റംബർ 30 വരെ മാത്രമായിരിക്കും രണ്ടായിരം രൂപാ നോട്ട് പണമിടപാടിനായി ഉപയോഗിക്കാൻ സാധിക്കുക.