മലയാളത്തിന്റെ നടന വിസ്മയം മോഹൻലാലിന് ഇന്ന് അറുപത്തിമൂന്നാം പിറന്നാൾ. മലയാളത്തിന്റെ പകരക്കാനില്ലാത്ത അഭിനേതാവിന് ആശംസ പ്രവാഹമാണ്. ‘ഹാപ്പി ബെർത്ത്ഡേ ലാലേട്ടാ..’ എന്നാണ് ഉണ്ണി മുകുന്ദൻ കുറിച്ചത്.
മോഹൻലാൽ സിബി മലയിൽ കൂട്ടുകെട്ടിൽ പിറന്ന ദശരഥം സിനിമയിലെ ഡയലോഗ് പങ്കുവെച്ചാണ് രമേശ് പിഷാരടി മോഹൻലാലിന് പിറന്നാൾ ആശംസകൾ നേർന്നത്. ‘ആനി മോനെ സ്നേഹിക്കുന്നത് പോലെ ഞങ്ങൾ നിങ്ങളെ സ്നേഹിക്കുന്നു .. ഹൃദയപൂർവം പിറന്നാൾ ആശംസകൾ’ എന്നായിരുന്നു അദ്ദേഹത്തിന്റെ ഫേസ്ബുക്ക് പോസ്റ്റ്.
നരേന്ദ്രനിൽ തുടങ്ങി കാളിദാസ് വരെ നിൽക്കുന്ന നടന ഇതിഹാസം മലയാളികൾക്ക് സ്വന്തം കുടുംബാംഗമാണ്. മഞ്ഞിൽ വിരിഞ്ഞ പൂക്കളിലെ വില്ലൻ വേഷത്തിൽ നിന്ന് ആരംഭിച്ച സിനിമാ ജീവിതം തുടങ്ങിയ മോഹൻലാൽ ഇന്ന് ബറോസ് എന്ന ചിത്രത്തിലൂടെ സംവിധായകന്റെ മേലങ്കികൂടി അണിഞ്ഞിരിക്കുകയാണ്.
താരത്തിന്റെ ജന്മദിനം ജീവകാരുണ്യ പ്രവർത്തനങ്ങളിലൂടെ ആഘോഷിക്കാനാണ് ഓൾ കേരള മോഹൻലാൽ ഫാൻസ് ആൻഡ് കൾച്ചറൽ വെൽഫെയർ അസോസിയേഷന്റെ തീരുമാനം. ഇതിന്റെ ഭാഗമായി സംസ്ഥാനത്തുടനീളം വിവിധ പരിപാടികൾ സംഘടിപ്പിക്കുന്നുണ്ട്. കൂടാതെ അണിയറയിൽ ജോലികൾ പുരോഗമിക്കുന്ന മോഹൻലാൽ ചിത്രങ്ങളുടെ അപ്ഡേറ്റുകളും പിറന്നാൾ ദിനത്തിൽ ആരാധകർ പ്രതീക്ഷിക്കുന്നുണ്ട്.
