മുംബൈ: നടനും മോഡലും കാസ്റ്റിങ് കോ-ഓർഡിനേറ്ററുമായ ആദിത്യ സിംഗ് രജ്പുതിനെ മരിച്ച നിലയിൽ കണ്ടെത്തി. അന്ധേരിയിലെ നടന്റെ വീടിനുള്ളിൽ ശുചിമുറിയിലാണ് മരിച്ച നിലയിൽ കണ്ടെത്തിയത്. തിങ്കളാഴ്ച ഉച്ചയോടെയാണ് സംഭവം. സുഹൃത്താണ് ആദിത്യയെ കണ്ടെത്തിയത്. തുടർന്ന് ഫ്‌ളാറ്റിലെ സുരക്ഷാ ജീവനക്കാരന്റെ സഹായത്തോടെ നടനെ ആശുപത്രിയിലെത്തിച്ചെങ്കിലും മരിച്ചെന്ന് സ്ഥിരീകരിക്കുകയായിരുന്നു. ലഹരിമരുന്നിന്റെ അമിതോപയോഗമാണ് മരണത്തിലേക്ക് നയിച്ചതെന്ന സൂചനകളും പുറത്തുവരുന്നുണ്ട്.
ഡൽഹിയിൽ ജനിച്ച ആദിത്യ ഫിലിം ഫീൽഡിൽ എത്തിയതോടെയാണ് മുംബൈയിൽ സ്ഥിരതാമസമാക്കിയത്. മോഡലിങ്ങിൽ കരിയർ ആരംഭിച്ച അദ്ദേഹം പിന്നീട് ക്രാന്തിവീർ, മേംനേ ഗാന്ധി കോ നഹീം മാര തുടങ്ങി നിരവധി ബോളിവുഡ് ചിത്രങ്ങളുടെ ഭാഗമായി. 300 ഓളം പരസ്യ ചിത്രങ്ങളിലും അഭിനയിച്ചു. സ്പ്‌ളിറ്റ്‌സ് വില്ല പോലുള്ള റിയാലിറ്റി ഷോകളിലും അദ്ദേഹം അവതരിച്ചിരുന്നു. കഴിഞ്ഞ ഏതാനും നാളുകളായി കാസ്റ്റിഗ് കോ-ഓർഡിനേറ്ററായാണ് പ്രവർത്തിച്ചിരുന്നത്. നടന്റെ അപ്രതീക്ഷിത വേർപാട് സുഹൃത്തുക്കൾക്കിടയിൽ ഞെട്ടലുളവാക്കിയിരിക്കുകയാണ്.
Comments