റഫാൽ യുദ്ധവിമാനം പറത്തിയ ഏക വനിതാ പൈലറ്റ് ആരെന്നറിയുമോ?. റഫാൽ യുദ്ധവിമാനം പറത്തിയ ആദ്യ വനിതാ പൈലറ്റും ഏക വനിതാ പൈലറ്റും ഒരാൾ തന്നെയാണ്, ലെഫ്റ്റനന്റ് ശിവാംഗി സിംഗ്. ഫ്രാൻസിലെ ഓറിയോൺ യുദ്ധാഭ്യാസത്തിൽ പങ്കെടുത്ത ഇന്ത്യൻ എയർഫോഴ്സ് (IAF) സംഘത്തിലെ അംഗമായിരുന്നു ശിവാംഗി. റാഫേൽ സ്ക്വാഡ്രണിലെ ആദ്യ വനിതാ യുദ്ധവിമാന പൈലറ്റായ അവർ പഞ്ചാബിലെ അംബാല ആസ്ഥാനമായുള്ള എയർഫോഴ്സിന്റെ ഗോൾഡൻ ആരോസ് സ്ക്വാഡ്രണിന്റെ ഭാഗമാണ്. ഇപ്പോഴിതാ, ചൈനയുമായി തുടരുന്ന അതിർത്തി സംഘർഷത്തിനിടയിൽ, പ്രദേശത്ത് വിമാനം പറത്തിയതിന്റെയും ഫ്രാൻസിൽ നടന്ന ഓറിയോൺ അഭ്യാസത്തിൽ പങ്കെടുത്തതിന്റെയും അനുഭവം പങ്കുവെച്ചിരിക്കുകയാണ് ശിവാംഗി.
ഞാൻ സംഘർഷ പ്രദേശത്ത് വിമാനം പറത്തി. ഞങ്ങളെ ഏൽപ്പിച്ച എല്ലാ ദൗത്യങ്ങളും ഞങ്ങൾക്ക് വളരെ അനായാസമായി തന്നെ നിർവഹിക്കാൻ സാധിച്ചു. ഫ്രാൻസിൽ നടന്ന ഓറിയോൺ അഭ്യാസത്തിലും ഇന്ത്യൻ വ്യോമസേനയെ പ്രതിനിധീകരിച്ച് പങ്കെടുക്കാൻ സാധിച്ചതിൽ അഭിമാനമുണ്ട്. യുഎസ്, യുകെ, ഫ്രാൻസ് എന്നിവയുൾപ്പെടെയുള്ള പ്രമുഖ രാജ്യങ്ങളും നോർത്ത് അറ്റ്ലാന്റിക് ട്രീറ്റി ഓർഗനൈസേഷൻ (നാറ്റോ) സൈനികരും പങ്കെടുത്തിരുന്നു. വിവിധ രാജ്യങ്ങളിലെ യുദ്ധവിമാന പൈലറ്റുമാരെ കാണാൻ അവസരം ലഭിച്ചത് വലിയ അനുഭവമായിരുന്നു. മറ്റ് രാജ്യങ്ങളിലെ പൈലറ്റുമാർ വിമാനം പറത്തുന്നത് നമ്മളിൽ നിന്ന് എങ്ങനെ വ്യത്യാസപ്പെടുന്നുവെന്നും അവിടുത്തെ അന്തരീക്ഷം എങ്ങനെയാണെന്നും ഇന്ത്യൻ പൈലറ്റുമാർക്ക് പഠിക്കാൻ സാധിച്ചു. മറ്റ് രാജ്യങ്ങളിലെ വനിതാ പൈലറ്റുമാരുമായി ഇടപഴകാനുള്ള അവസരവും ലഭിച്ചെന്നും തനിക്ക് ഇതൊരു മികച്ച പഠനമാണെന്നും ഫ്ലൈറ്റ് ലെഫ്റ്റനന്റ് ശിവാംഗി മാദ്ധ്യമങ്ങളോട് പറഞ്ഞു.
ഉത്തർപ്രദേശിലെ വാരണാസി സ്വദേശിയായ ശിവാംഗി സിംഗ് 2017-ലാണ് ഇന്ത്യൻ വ്യോമസേനയിൽ ചേരുന്നത്. ശേഷം, ഐഎഎഫിന്റെ വനിതാ യുദ്ധവിമാന പൈലറ്റുമാരുടെ രണ്ടാം ബാച്ചിലേക്ക് കമ്മീഷൻ ചെയ്യുകയും ചെയ്തു. 2020-ൽ കർശനമായ തിരഞ്ഞെടുപ്പ് പ്രക്രിയയ്‌ക്ക് ശേഷം റഫാൽ പൈലറ്റായി ശിവാംഗി തിരഞ്ഞെടുക്കപ്പെട്ടു. അങ്ങനെ, റഫാൽ പറത്തുന്ന ആദ്യത്തെ വനിതാ യുദ്ധവിമാന പൈലറ്റായി മാറി ശിവാംഗി സിംഗ്. റഫേലിന് മുന്ന് മിഗ്-21 ബൈസൺ വിമാനവും ശിവാംഗി പറത്തിയിരുന്നു. റഫാൽ ജെറ്റുകളുടെ ആദ്യ ബാച്ച് 2020 ജൂലൈ 29-നാണ് ഇന്ത്യയിലെത്തിയത്. ഇന്ത്യൻ എയർഫോഴ്സിന്റെ (IAF) അവസാനത്തെ 36 റാഫേൽ യുദ്ധവിമാനങ്ങൾ കഴിഞ്ഞ വർഷം ഡിസംബറിൽ ഫ്രാൻസിൽ നിന്നും ഇന്ത്യയിൽ ലാൻഡ് ചെയ്തു.
Comments