അറുപതാം വയസിൽ വീണ്ടും വിവാഹിതനായെന്ന വാർത്തകൾക്ക് പിന്നാലെ സോഷ്യൽ മീഡിയയിൽ ഉയർന്ന ചർച്ചകൾക്ക് മറുപടിയുമായി നടൻ ആശിഷ് വിദ്യാർത്ഥി. ആദ്യ ഭാര്യ പിലൂ വിദ്യാർത്ഥിയുമായുള്ള വേർപിരിയലിനെക്കുറിച്ചും പിന്നീട് രൂപാലി ബറുവയെ കണ്ടുമുട്ടിയതിനെക്കുറിച്ചും നടൻ വിശദീകരിച്ചു. ഇൻസ്റ്റഗ്രാമിൽ പങ്കുവച്ച വീഡിയോയിലൂടെയായിരുന്നു അദ്ദേഹം മനസുതുറന്നത്.
“നാമെല്ലാവർക്കും സന്തോഷമായി ഇരിക്കാനാണ് ആഗ്രഹം. 22 വർഷങ്ങൾക്ക് മുമ്പായിരുന്നു പിലൂവും ഞാനും കണ്ടുമുട്ടുന്നത്. ഞങ്ങൾ വിവാഹിതരായി. വളരെ മനോഹരമായിരുന്നു ആ യാത്ര. ഞങ്ങൾക്ക് അർത്ഥ് എന്ന മകൻ ജനിച്ചു. അവനിന്ന് 22 വയസുണ്ട്. കഴിഞ്ഞ രണ്ട് വർഷമായി എന്തൊക്കെയോ കാരണങ്ങൾ കൊണ്ട് പിലൂവും ഞാനും തമ്മിൽ ഭാവിയെ നോക്കി കാണുന്നതിൽ ചില വ്യത്യാസങ്ങളുണ്ടായി. ഈ വ്യത്യാസങ്ങൾ പരിഹരിക്കാൻ കഴിയുമോയെന്ന് ഞങ്ങൾ പരിശോധിച്ചു. അതിന് കഴിയുമെങ്കിലും മറ്റൊരാളുടെ മേൽ അത് അടിച്ചേൽപ്പിക്കുന്ന തരത്തിലിയാരിക്കും. അത് സന്തോഷത്തെ ഇല്ലാതാക്കും. സന്തോഷം മാത്രമല്ലേ നമ്മൾ ആഗ്രഹിക്കുന്നത്.
അതിനാൽ ഞങ്ങൾ ഒരുമിച്ച് ഇരുന്ന് ആലോചിച്ചു. സൗഹാർദപരമായി ഒരുമിച്ച് പോകാൻ പറ്റുന്നില്ലെങ്കിൽ നമുക്ക് വ്യത്യസ്ത വഴികളിലൂടെ നടക്കാം.. പക്ഷെ സൗഹാർദപരമായി തുടരാമെന്ന് ഞങ്ങൾ തീരുമാനിച്ചു. അതാണ് ഞങ്ങൾ ചെയ്തത്. ഞാൻ വീണ്ടും വിവാഹം കഴിക്കുമെന്ന് എനിക്കുറപ്പായിരുന്നു. കാരണം, ജീവിതയാത്രയിൽ എനിക്കൊരു കൂട്ട് വേണം. ശേഷമാണ് രൂപാലിയെ കാണാനിടയായത്. ഒരു വർഷം മുമ്പായിരുന്നു അത്. പരസ്പരം താത്പര്യം തോന്നിയതിനാൽ ഭാര്യാ ഭർത്താക്കന്മാരായി ജീവിക്കാൻ ഞങ്ങൾ തീരുമാനിച്ചു. രൂപാലിക്ക് 50 ആണ് പ്രായം എനിക്ക് 57ഉം. അറുപത് വയസായിട്ടില്ല. പ്രായം അല്ലെങ്കിലും ഒരു വിഷയമല്ലല്ലോ.. നമ്മുടെ വയസ് എത്ര തന്നെയാണെങ്കിലും നമുക്ക് സന്തോഷത്തോടെ ഇരിക്കാൻ കഴിയണം. പരസ്പരം ബഹുമാനത്തോടെ മുന്നോട്ട് പോകുക. ” ഇതായിരുന്നു ആശിഷ് വിദ്യാർത്ഥി പറഞ്ഞത്.
Read Also: നടൻ ആശിഷ് വിദ്യാർത്ഥി വീണ്ടും വിവാഹിതനായി; വധു അസം സ്വദേശി
Comments