ന്യൂഡൽഹി: പ്രതിപക്ഷ പാർട്ടികൾ പുതിയ പാർലിമെന്റിന്റെ ഉദ്ഘാടന ചടങ്ങ് ബഹിഷ്കരിക്കുന്നതിനെ വിമർശിച്ച് ഡി.പി.എ.പി പാർട്ടി അദ്ധ്യക്ഷനും മുൻ രാജ്യസഭ പ്രതിപക്ഷ നേതാവുമായ ഗുലാം നബി ആസാദ്. റെക്കോർഡ് സമയത്തിനുള്ളിൽ പാർലിമെന്റ് പണി പൂർത്തിയാക്കിയ കേന്ദ്രത്തെ അഭിനന്ദിക്കണമെന്നാണ് അദ്ദേഹം പറഞ്ഞു.
ഒരു പുതിയ പാർലിമെന്റ് മന്ദിരം അനിവാര്യമായിരുന്നു. പ്രധാനമന്ത്രിയാണോ രാഷ്ട്രപതിയാണോ അത് ഉദ്ഘാടനം ചെയ്യുന്നത് എന്നതിൽ വലിയ കാര്യമില്ല. ഉദ്ഘാടന ദിവസം ഡൽഹിയിൽ ഉണ്ടായിരുന്നെങ്കിൽ ചടങ്ങിൽ പങ്കെടുക്കുമായിരുന്നു. എന്നാൽ അന്ന് മറ്റൊരു പരിപാടിയുള്ളതിനാൽ ചടങ്ങിനെത്തില്ലെന്നും അദ്ദേഹം കൂട്ടിച്ചേർത്തു.
മുമ്പ് താൻ പാർലിമെന്ററികാര്യ മന്ത്രിയായിരുന്നപ്പോൾ പുതിയ പാർലിമെന്റ് മന്ദിരം സ്വപ്നം കണ്ടിരുന്നു. അന്നത്തെ പ്രധാനമന്ത്രി നരസിംഹ റാവുവും ശിവരാജ് പാട്ടീലും ഞാനും പദ്ധതിയെക്കുറിച്ച് ചർച്ചചെയ്യുകയും രൂപരേഖയുണ്ടാക്കുകയും ചെയ്തിരുന്നു. എന്നാൽ ഇത് നടന്നില്ല. ഇന്നതിന്റെ നിർമാണം പൂർത്തിയായി. അത് നല്ലൊരു കാര്യമാണ്. ഈ കുറഞ്ഞ സമയത്തിനുള്ളിൽ പാർലിമെന്റ് മന്ദിരം പൂർത്തിയാക്കിയത് അത്ര ചെറിയ കാര്യമല്ല. ഈ നേട്ടം കൈവരിച്ച കേന്ദ്രസർക്കാരിനെ അഭിനന്ദിക്കുന്നു എന്നും ഗുലാം നബി ആസാദ് പറഞ്ഞു.
Comments