ഇടുക്കി: ഔദ്യോഗിക വാഹനം സ്വകാര്യ ആവശ്യത്തിന് ഉപയോഗിച്ച പഞ്ചായത്ത് സെക്രട്ടറിയ്ക്ക് പിഴ. ഇടുക്കി കുമാരമംഗലം പഞ്ചായത്ത് സെക്രട്ടറി ഷേർളി ജോൺ 13,288 രൂപ അടയ്ക്കണമെന്ന് ധനകാര്യ പരിശോധന വിഭാഗം വ്യക്തമാക്കി. കുമാരമംഗലം ഗ്രാമപഞ്ചായത്തിന്റെ ഔദ്യോഗിക വാഹനമായ മഹീന്ദ്ര ബൊലി സ്വകാര്യ യാത്രയ്ക്കായി സ്ഥിരം ഉപയോഗിക്കുന്നുവെന്ന് പരാതി ലഭിച്ചതിനെ തുടർന്നാണ് സ്ക്വാഡ് പരിശോധന നടത്തിയത്.
വാഹനത്തിന്റെ ലോഗ് ബുക്ക്, ഇന്ധന രജിസ്റ്റർ എന്നിവ പരിശോധിച്ചതിൽ അനൗദ്യോഗിക യാത്രകൾക്ക് വാഹനം ഉപയോഗിച്ചുവെന്ന് കണ്ടെത്തി. ഇത്തരത്തിൽ 1,208 കിലോമീറ്ററാണ് സഞ്ചരിച്ചത്. ഇതിന്റെ തുകയായ 13,288 രൂപ വാഹനത്തിന്റെ കസ്റ്റോഡിയനായ പഞ്ചായത്ത് സെക്രട്ടറിയിൽ നിന്ന് ഈടാക്കണമെന്ന് ധനകാര്യ പരിശോധന വിഭാഗം വ്യക്തമാക്കി.
ധനകാര്യവകുപ്പിന്റെ സർക്കുലർ പ്രകാരം ഇന്ധനക്ഷമത ടെസ്റ്റ് എല്ലാവർഷവും കൃത്യസമയത്ത് നടത്തേണ്ടതാണ്. സർട്ടിഫിക്കറ്റ് ലോഗ ബുക്കിൽ പതിപ്പിച്ചിരിക്കണമെന്ന നിർദ്ദേശവും പഞ്ചായത്ത് സെക്രട്ടറി പാലിച്ചില്ല. യാത്ര ചെയ്ത ദൂരത്തെ സംബന്ധിച്ചും സംരക്ഷിത കുറിപ്പ് ലോഗ് ബിക്കിൽ ഓരോ മാസവും അവസാനത്തെ ദിവസവും രേഖപ്പെടുത്തണം. എന്നാൽ ഗ്രാമപഞ്ചായത്തിലെ ലോഗ് ബുക്കിൽ രേഖപ്പെടുത്തിയിട്ടില്ലെന്നും റിപ്പോർട്ടിൽ പറയുന്നു.
