ഭോപ്പാൽ: മദ്ധ്യപ്രദേശ് സർക്കാരിന്റെ പ്രധാന പദ്ധതികളിലൊന്നായ ലാഡ്ലി ബെഹ്നയുടെ ഗുണഭോക്താക്കൾക്ക് അനുമതി കത്ത് വിതരണം ചെയ്ത് മുഖ്യമന്ത്രി ശിവരാജ് സിംഗ് ചൗഹാൻ. ഭോപ്പാലിലെ ദുഗാനഗർ ചേരി പ്രദേശത്തുള്ള അർഹരായ ഗുണഭോക്താക്കൾക്കാണ് അനുമതി കത്ത് നൽകിയത്. പദ്ധതി പ്രകാരം അർഹരായ സ്ത്രീകൾക്ക് ജൂൺ പത്ത് മുതൽ അവരുടെ ബാങ്ക് അക്കൗണ്ടുകളിലേക്ക് പ്രതിമാസം ആയിരം രൂപ വീതം ലഭിക്കുന്നതാണ്.
സർക്കാർ ഓഫീസുകൾ കയറിയിറങ്ങേണ്ട പ്രയാസം ഒഴിവാക്കുന്നതിനായി അർഹർക്ക് ലഭിക്കേണ്ട അനുമതി കത്തുകൾ അവരുടെ വീട്ടുവാതിൽക്കൽ എത്തി വിതരണം ചെയ്യുകയായിരുന്നു സർക്കാർ പ്രതിനിധികൾ. ഗുണഭോക്താക്കളിൽ ഉൾപ്പെട്ട നാല് സ്ത്രീകളുടെ വീടുകളിൽ മുഖ്യമന്ത്രി നേരിട്ടെത്തിയാണ് അനുമതി കത്ത് നൽകിയത്. സ്ത്രീ ശാക്തീകരണം ലക്ഷ്യമിട്ട് ആരംഭിച്ച പദ്ധതി അവരുടെ ആത്മവിശ്വാസം വർധിപ്പിക്കാൻ സഹായിക്കുമെന്ന് ശിവരാജ് സിംഗ് ചൗഹാൻ പ്രതികരിച്ചു.
ലാഡ്ലി ബെഹ്ന പദ്ധതിയുടെ ആനുകൂല്യം ലഭിക്കുന്നതിനായി സംസ്ഥാനത്തെ 1.25 കോടി സ്ത്രീകളാണ് ഇതുവരെ രജിസ്റ്റർ ചെയ്തിരിക്കുന്നത്. അതേസമയം ഈ വർഷാവസാനം നടക്കാനിരിക്കുന്ന നിയമസഭാ തിരഞ്ഞെടുപ്പിലൂടെ അധികാരത്തിലെത്തിയാൽ പ്രതിമാസം സ്ത്രീകൾക്ക് 1500 രൂപ നൽകാമെന്നാണ് കോൺഗ്രസിന്റെ വാഗ്ദാനം.
