ന്യൂഡൽഹി : കേരളത്തിൽ ട്രെയിനിന് തീവെച്ച സംഭവം വളരെ ഗൗരവത്തോടെയാണ് കാണുന്നതെന്ന് കേന്ദ്ര റെയിൽവെ മന്ത്രി അശ്വനി വൈഷ്ണവ്. കുറ്റക്കാർക്കെതിരെ കർശന നടപടി ഉണ്ടാകും. കഴിഞ്ഞ ദിവസം കണ്ണൂരിൽ ട്രെയിനിന് തീ വെച്ച സംഭവവും എൻഐഎ അന്വേഷിക്കുമെന്നും അദ്ദേഹം വ്യക്തമാക്കി. ഇതിനോടകം എൻഐഎ പ്രാഥമിക അന്വേഷണം നടത്തിയിട്ടുണ്ടെന്നും ബിജെപി ആസ്ഥാനത്ത് നടന്ന വാർത്ത സമ്മേളനത്തിൽ റെയിൽവെ മന്ത്രി വ്യക്തമാക്കി.
കേരളത്തിൽ അടുത്തിടെ ട്രെയിനിന് തീ വെക്കുന്ന സംഭവങ്ങൾ ഏറെ ഗൗരവത്തോടെയും ആശങ്കയയോടെയുമാണ് നോക്കികാണുന്നതെന്ന് കേന്ദ്ര റെയിൽവേ മന്ത്രി അശ്വനി വൈഷ്ണവ് വ്യക്തമാക്കി. കുറ്റകൃത്യം നടത്തിയവരെയും അതിന് പിറകിലുള്ളവരെയും വെറുതെ വിടില്ല.
ഭീകരവാദ ബന്ധം സ്ഥിരീകരിച്ച എലത്തൂർ ട്രെയിൻ തീ വെപ്പ് കേസിൽ ദേശീയ അന്വേഷണ ഏജൻസിയുടെ നടപടികൾ പുരോഗമിക്കുകയാണെന്നും കുറ്റക്കാരെ വെറുതെ വിടില്ലെന്നും അദ്ദേഹം വ്യക്തമാക്കി. കേരളത്തിൽ ട്രെയിനിന് തീവെച്ച കേസുകളിലെ തുടർനടപടികൾ കേന്ദ്ര ആഭ്യന്തര മന്ത്രാലയവും ഗൗരവത്തോടെ നിരീക്ഷിക്കുന്നുണ്ട്.
