അട്ടപ്പാടി: പാലക്കാട് അട്ടപ്പാടിയിൽ കാട്ടാനകൾ തമ്മിലുള്ള ഏറ്റുമുട്ടലിൽ ഒരു കുട്ടിയാന ചരിഞ്ഞു. ചരിഞ്ഞ ആനയുടെ പോസ്റ്റുമോർട്ടം നടത്തി സംസ്കരിക്കും. പുതൂർ പഞ്ചായത്ത് ചാളയൂരിൽ ആദിവാസി ഊരിന് സമീപത്താണ് ഏറ്റുമുട്ടലുണ്ടായത്. ഇന്ന് രാവിലെ ഊരിന് സമീപം എത്തിയ ആനകളെ നാട്ടുകാർ തുരത്തിയോടിച്ചിരുന്നു. പിന്നീട് വീണ്ടും എത്തിയ കാട്ടാനകൾ തമ്മിൽ കൊമ്പ് കോർക്കുകയായിരുന്നു.
പാലക്കാട് ജില്ലയിലെ പല മേഖലകളിലും വന്യമൃഗ ശല്യം രൂക്ഷമാണ്. മെയ് അവസാന വാരത്തിൽ മലമ്പുഴയിൽ കാട്ടാനക്കൂട്ടം ഇറങ്ങിയിരുന്നു. മലമ്പുഴ ഡാമിന്റെ വൃഷ്ടി പ്രദേശത്താണ് കാട്ടാനകൾ ഇറങ്ങിയത്. ഇങ്ങനെ വരുന്ന കാട്ടാനക്കൂട്ടത്തിന് മുന്നിൽ മേഖലയിലെ പലരും കുടുങ്ങാറുണ്ട്. തലനാരിഴയ്ക്കാണ് രക്ഷപ്പെടുന്നത്.
