ന്യൂഡൽഹി: ഇന്ത്യൻ പ്രധാനമന്ത്രിയ്ക്ക് ലോകത്തിന്റെ എല്ലാ കോണുകളിൽ നിന്നും ബഹുമാനം ലഭിക്കുന്നുണ്ടെന്നും അതിൽ അഭിമാനിക്കുകയാണെന്നും കോൺഗ്രസ് നേതാവ് സാം പിത്രോദ. അദ്ദേഹം ബഹുമാനിക്കേണ്ടയാളാണെന്നും ഇന്ത്യൻ ഓവർസീസ് കോൺഗ്രസ് ചെയർമാൻ വ്യക്തമാക്കി. നരേന്ദ്രമോദിയുടെ യുഎസ് സന്ദർശനത്തിന് മുന്നോടിയായിട്ടായിരുന്നു സാം പിത്രോദോയുടെ പരാമർശം. നിലവിൽ യുഎസ് സന്ദർശിക്കുന്ന രാഹുലിന്റെ സംഘാംഗങ്ങളിൽ ഒരാളാണ് സാം പിത്രോദ.
‘ നരേന്ദ്രമോദിയ്ക്ക് ലോകമെമ്പാടും വലിയ സ്വീകരണങ്ങളാണ് ലഭിക്കുന്നത്. ഇതിൽ ഞാൻ സന്തോഷവാനാണ്. അദ്ദേഹം എന്റെ രാജ്യത്തിന്റെ പ്രധാനമന്ത്രിയാണ്. ഇന്ത്യൻ പ്രധാനമന്ത്രിയായിട്ടാണ് ലോകത്ത് അദ്ദേഹം സ്വീകരിക്കപ്പെടുന്നത്, ബിജെപി പ്രധാനമന്ത്രിയായിട്ടല്ല . ഇതാണ് വ്യത്യാസം’- അദ്ദേഹം പറഞ്ഞു.
റഷ്യ-യുക്രെയ്ൻ സംഘർഷത്തിൽ ഇന്ത്യയുടെ നിലപാടിനെ പ്രശംസിച്ച് രാഹുൽ ഗാന്ധി രംഗത്തെത്തിയിരുന്നു. ഇതിനോടായിരുന്നു സാം പിത്രോദയുടെ പ്രതികരണം. ഇന്ത്യ എവിടെയൊക്കയാണ് ശരി ചെയ്യുന്നതെന്ന് രാഹുൽ ഗാന്ധിയ്ക്ക് നന്നായിട്ടറിയാം. കഴിഞ്ഞ ദിവസം ആരോ എന്നോട് പറഞ്ഞു, ഇന്ത്യൻ പ്രധാനമന്ത്രിയ്ക്ക് എല്ലായിടത്തും വലിയ സ്വീകരണമാണ് ലഭിക്കുന്നതെന്ന് . എനിക്ക് അതിൽ വലിയ സന്തോഷമുണ്ടെന്ന് താൻ മറുപടി പറഞ്ഞതായും അദ്ദേഹം വ്യക്തമാക്കി.
150 കോടി ജനങ്ങൾക്കുള്ള ഒരു രാജ്യത്തിന്റെ പ്രധാനമന്ത്രി എല്ലായിടത്തും ബഹുമാനം അർഹിക്കുന്നുണ്ട്. ഞാൻ അതിൽ വളരെയധികം അഭിമാനിക്കുന്നു. അക്കാര്യം ഞാൻ ഒരിക്കലും നിഷേധിക്കില്ല. രാഹുൽ ഗാന്ധിയ്ക്കും മികച്ച സ്വീകരണവും പ്രതികരണങ്ങളുമാണ് ലഭിക്കുന്നതെന്നും പിത്രോദ പറഞ്ഞു.
