തനിക്കെതിരെ പ്രചരിക്കുന്ന വ്യാജവാർത്തയിൽ പ്രതികരിച്ച് തെലുങ്ക് സൂപ്പർ സ്റ്റാർ ചിരഞ്ജീവി. അടുത്തിടെ താരത്തിന് കാൻസർ ആണെന്ന തരത്തിൽ വാർത്തകൾ പ്രചരിച്ചിരുന്നു. ചില ഓൺലൈൻ മാദ്ധ്യമങ്ങളാണ് ഇത്തരത്തിൽ വാർത്ത പ്രചരിപ്പിച്ചത്. വാർത്തകൾ പുറത്ത് വന്നതിന് ശേഷം നടന്റെ ആരാധകർ വലിയ ആശങ്കയിലായിരുന്നു. തുടർന്നാണ് പ്രതികരണവുമായി താരം രംഗത്തെത്തിയത്. ട്വിറ്ററിലൂടെയാണ് ചിരഞ്ജീവി വാർത്തകളോട് പ്രതികരിച്ചത്.
ഇടയ്ക്കിടെയുള്ള ബോഡി ചെക്കപ്പുകൾ കൃത്യമായി നടത്തുന്നുണ്ട്. കാൻസർ ബാധിച്ചു എന്ന തരത്തിൽ പുറത്തുവരുന്ന വാർത്തകൾ തീർത്തും അസത്യമാണെന്നും അദ്ദേഹം പറഞ്ഞു. കുറച്ചു നാളുകൾക്ക് മുൻപ് ഒരു ക്യാൻസർ സെന്ററിന്റെ ഉദ്ഘാടന വേളയിൽ ക്യാൻസറിനെ കുറിച്ച് അവബോധം ഉണ്ടാണമെന്ന് സംസാരിച്ചിരുന്നു. കൂടാതെ താൻ മുൻപ് കോളൻ സ്കോപ്പ് ടെസ്റ്റ് നടത്തിയെന്നും ക്യാൻസർ അല്ലാത്ത പോളിപ്സ് കണ്ടെത്തിയിരുന്നെന്നും പറഞ്ഞു. ആദ്യം ടെസ്റ്റ് ചെയ്തതുകൊണ്ടാണ് ക്യാൻസർ ആയി മാറുന്നതിന് മുൻപ് അറിഞ്ഞതെന്നും താൻ പറഞ്ഞിരുന്നു എന്നും അദ്ദേഹം വ്യക്തമാക്കി.
എന്നാൽ ചില മാദ്ധ്യമങ്ങൾ ഞാൻ പറഞ്ഞത് മനസിലാക്കാതെ എനിക്ക് കാൻസർ വന്നുവെന്ന തരത്തിൽ വാർത്തകൾ പ്രചരിപ്പിച്ചു. ഈ വാർത്ത തന്റെ ആരാധകർക്കിടയിൽ വലിയ ആശയക്കുഴപ്പം ഉണ്ടാക്കി എന്നും അദ്ദേഹം കൂട്ടിച്ചേർത്തു. നിരവധി ആരാധകർ തന്റെ ആരോഗ്യ പ്രശ്നത്തെ കുറിച്ച് അറിയാൻ എത്തുന്നുണ്ട്. ഇനിയെങ്കിലും ഇത്തരത്തിൽ വാർത്ത പ്രചരിപ്പിക്കരുതെന്നും അദ്ദേഹം പറഞ്ഞു.
Comments