ഇനി അന്താരാഷ്ട്ര ബ്രാൻഡുകളുടെ വസ്ത്രം ധരിക്കില്ലെന്ന് നടി കങ്കണ റണാവത്. ഫാഷൻ ബ്രാൻഡുകളുടെ പോക്കറ്റ് നിറച്ചുകൊണ്ട് താൻ ഇത്രയും നാളും മുതലാളിത്തത്തിന്റെ ഇരയാവുകയായിരുന്നു എന്ന് തുറന്ന് പറഞ്ഞു കൊണ്ട് രംഗത്തെത്തിയിരിക്കുകയാണ് കങ്കണ.
2018 മുതൽ മുംബൈ വിമാനത്താവളത്തിൽ വെച്ചെടുത്ത താരത്തിന്റെ ഫാഷൻ ലുക്കുകൾ ഇൻസ്റ്റഗ്രാം സ്റ്റോറിയാക്കിക്കൊണ്ടായിരുന്നു താരത്തിന്റെ തുറന്നു പറച്ചിൽ. പല അന്താരാഷ്ട്ര ബ്രാൻഡുകളുടേയും പ്രമുഖ ഡിസൈനർമാരുടെ വസ്ത്രങ്ങൾ മാത്രം വാങ്ങിക്കൊണ്ട് അവരുടെ പോക്കറ്റ ഞാൻ നിറച്ചു. നമ്മുടെ സംസ്കാരം നശിപ്പിക്കുകയാണ് പക്ഷേ അവർ ചെയ്തത്. പരിസ്ഥിതിക്ക് ഇത്തരം വസ്ത്രങ്ങളും ബാഗുകളും ഏത് തരത്തിലുള്ള പത്യാഘാതം ഉണ്ടാക്കുമെന്ന് പോലും താൻ ചിന്തിച്ചിട്ടില്ലെന്നും താരം പറയുന്നു.
അന്താരാഷ്ട്ര ഡിസൈനർമാരുടെ വസ്ത്രങ്ങൾ പാശ്ചാത്യ സ്ത്രീയെ പോലെയാവാനാണ് ധരിച്ചത്. ഇപ്പോൾ ഒരു വസ്ത്രം വാങ്ങിയാൽ എത്ര ഇന്ത്യൻ നെയ്തുകാർക്ക് പ്രയോജനം കിട്ടുന്നുണ്ടെന്ന് മാത്രമാണ് താൻ ഓർക്കുന്നതെന്നും കങ്കണ കൂട്ടിച്ചേർക്കുന്നു.
