ശ്രീനഗർ: ജീവിതത്തിലെ എല്ലാ പ്രതിസന്ധികളും തരണം ചെയ്ത് കോർപ്പറേറ്റ് ലോകത്ത് തന്റേതായ വ്യക്തിമുദ്ര പതിപ്പിച്ച് കശ്മീരി ട്രാൻസ് വുമൺ. സമൂഹത്തിൽ വേറിട്ട വ്യക്തിത്വം സൃഷ്ടിക്കുന്നതിൽ വിജയിക്കുകയും തന്റെ സാന്നിധ്യം കൊണ്ട് തന്റേതായ സ്ഥാനം അടയാളപ്പെടുത്തുകയും ചെയ്ത കശ്മീരിലെ ആദ്യത്തെ ട്രാൻസ് വനിതയാണ് ഷൊയിബ് ഖാൻ. ശ്രീനഗർ സ്വദേശിയാണ് ഷോയിബ് ബിസിനസ് മേഖലയിൽ മികച്ച വിജയം കൈവരിച്ച് മുന്നേറുകയാണ്.
ഒരു ട്രാൻസ് വനിത എന്ന നിലയിൽ നേരിട്ട പ്രശ്നങ്ങളെ അവഗണിച്ചുകൊണ്ട് തന്റെ ധൈര്യവും കഠിനാധ്വാനവും ആയുധമാക്കി വിജയിച്ച വ്യക്തിയാണ് ഷൊയ്ബ്. സ്കൂളിൽ നിന്ന് കോളേജിലേക്കും യൂണിവേഴ്സിറ്റിയിൽ നിന്ന് ബിസിനസ് മേഖലയിലേക്കുമുള്ള ഷൊയ്ബിന്റെ യാത്ര അത്ര എളുപ്പമായിരുന്നില്ല. ജനനം മുതൽ മരണം വരെ ഒരു ട്രാൻസ്ജെൻഡർ അനുഭവിക്കുന്ന പ്രശ്നങ്ങളും ബുദ്ധിമുട്ടുകളും ഒരു സാധാരണ വ്യക്തിയ്ക്ക് സങ്കൽപ്പിക്കാൻ പോലും കഴിയാത്തതാണ്. അത്തരം സാഹചര്യങ്ങളെ വെല്ലുവിളിച്ച് കഴിവ് തെളിയിച്ച വ്യക്തിത്വത്തിന് ഉടമയാണ് ഈ ട്രാൻസ് വനിത.
എയർലൈനിൽ ഫ്ലൈറ്റ് അറ്റന്ററായി ജോലി ചെയ്തതാണ് ഷൊയ്ബിന്റെ വിജയത്തിന്റെ തുടക്കം. ‘പ്രതിസന്ധികളും സാമൂഹിക വിവേചനവും ഉൾകൊണ്ട് ഭാവി രൂപീകരിക്കാനാണ് താൻ ശ്രമിച്ചത്. പോരാട്ടങ്ങൾ ഇന്നെനിക്ക് ഒരു പുതിയ വഴി കാണിച്ചുതന്നു, ഇന്നലെ വരെ എന്നെ പരിഹസിച്ചവർ ഇന്ന് എന്നെ ബഹുമാനിക്കുന്നു’. ചിലർക്ക് എന്നോട് അസൂയയാണെന്ന് ഷൊയിബ് പറഞ്ഞു. ട്രാൻസ്ജെൻഡറുകളിൽ ഭൂരിഭാഗവും വിദ്യാസമ്പന്നരാണ്, എന്നാലും എവിടെ പോയാലും അവർക്ക് അവഗണന മാത്രമെന്നും ഷൊയിബ് ചൂണ്ടിക്കാട്ടി.
Comments