പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രമാണ് പ്രഭാസ് നായകനാവുന്ന ആദിപുരുഷ്. ഇതിഹാസ കാവ്യമായ രാമായണത്തെ ആസ്പദമാക്കി ഒരുക്കുന്ന ചിത്രത്തിന് വൻ വരവേൽപ്പാണ് ലഭിക്കുന്നത്. ഇപ്പോഴിതാ തിരുപ്പതിയിലെ ശ്രീ വെങ്കിടേശ്വര സർവ്വകലാശാലയിൽ ചിത്രത്തിന്റെ പ്രീ-റിലീസ് ഇവന്റിനിടെ അയോദ്ധ്യ രാമക്ഷേത്രത്തിന്റെ പകർപ്പും പ്രദർശിപ്പിച്ചിരിക്കുകയാണ്.
അയോദ്ധ്യയിലെ രാമക്ഷേത്രത്തിന്റെ പകർപ്പ് പ്രദർശിപ്പിക്കാൻ എൽഇഡി സ്‌ക്രീനുകളാണ് ഉപയോഗിച്ചിരിക്കുന്നത്. ഇതിന്റെ ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. സിനിമയിലെ താരങ്ങളും അണിയറ പ്രവർത്തകരും ചടങ്ങിൽ പങ്കെടുത്തു. ശ്രീ.ശ്രീ.ശ്രീ ത്രിദാന്തി ചിന്നരാമാനുജ ജീയാർ സ്വാമിജിയായിരുന്നു മുഖ്യാതിഥി. നടൻ പ്രഭാസ്, നടി കൃതി സനോൺ, സംവിധായകൻ ഓം റൗത്ത്, നിർമാതാവ് ഭൂഷൺ കുമാർ എന്നിവർ ചേർന്ന് അദ്ദേഹത്തെ ആദരിച്ചു.
തിരുപ്പതി ശ്രീ വെങ്കടേശ്വര യൂണിവേഴ്സിറ്റി സ്റ്റേഡിയം താരകരാമ പവലിയനിലാണ് ആദിപുരുഷ് പ്രീ റിലീസ് ഇവന്റ് നടന്നത്. കഴിഞ്ഞ ദിവസം വൈകുന്നേരം നടന്ന പരിപാടിയിൽ ആയിരക്കണക്കിന് ആരാധകർ പങ്കെടുത്തു. വേദിയിലേക്കെത്തിയ പ്രഭാസിനെ ‘ബാഹുബലി’ എന്ന ഹർഷാരവത്തോടെയാണ് ആരാധകർ സ്വീകരിച്ചത്. നിലവിൽ ചിത്രത്തിന്റെ വിദേശ ബുക്കിംഗ് ആരംഭിച്ചു, തദ്ദേശീയ ഭാഷകളിലുള്ള ബുക്കിംഗ് ഉടൻ ആരംഭിക്കും.
രാമായണത്തെ അടിസ്ഥാനമാക്കിയുള്ള ചിത്രമാണ് ആദിപുരുഷ്. ദേശീയ അവാർഡ് ജേതാവ് ഓം റൗത്ത് തിരക്കഥയെഴുതി സംവിധാനം ചെയുന്ന ചിത്രത്തിൽ ശ്രീരാമനായി പ്രഭാസും സീതയായി കൃതി സനോനും ലക്ഷ്മണനായി സണ്ണി സിംഗും , ഹനുമാൻ ആയി ദേവദത്ത നാഗേയും രാവണനായി സെയ്ഫ് അലിഖാനും അഭിനയിക്കുന്നു. സഞ്ചിത് ബൽഹാരയും അങ്കിത് ബൽഹാരയും ചേർന്നാണ് ചിത്രത്തിന്റെ പശ്ചാത്തലസംഗീതം നിർവ്വഹിച്ചിരിക്കുന്നത്. അജയ്-അതുൽ, സച്ചേത്-പരമ്പര എന്നിവർ ചേർന്നാണ് ഗാനങ്ങൾ ഒരുക്കിയിരിക്കുന്നത്. ഹിന്ദി, തമിഴ്, തെലുങ്ക്, കന്നഡ, മലയാളം തുടങ്ങിയ ഭാഷകളിൽ സിനിമ റിലീസ് ചെയ്യും. താനാജിക്ക് ശേഷം ഓം റൗത്ത് സംവിധാനം ചെയ്യുന്ന സിനിമയാണ് ആദിപുരുഷ്.
ജൂൺ 16-നാണ് ചിത്രം റിലീസ് ചെയ്യുന്നത്. ബിഗ് സ്ക്രീനിൽ റിലീസ് ചെയ്യാൻ ദിവസങ്ങൾ മാത്രം ബാക്കി നിൽക്കെ സിനിമയുടെ ഫൈനൽ ട്രെയിലർ കഴിഞ്ഞ ദിവസമാണ് അണിയറ പ്രവർത്തകർ പുറത്തുവിട്ടത്. രാമ-രാവണ യുദ്ധമാണ് ട്രെയിലറിൽ കാണിച്ചിരിക്കുന്നത്. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ട്രെയിലറാണ് പുറത്തു വന്നിരിക്കുന്നത്.
