ഇലക്കറികൾ കഴിക്കുന്നവരാണോ? നിങ്ങളെ കാത്തിരിക്കുന്നത് ഇതൊക്കയാണ്!

ആരോഗ്യ പരിപാലനത്തിൽ ഒഴിച്ചുകൂടാനാകാത്ത ഒന്നാണ് ഇലക്കറികൾ. ആഴ്ചയിലൊരിക്കലെങ്കിലും ഇലക്കറി ശീലമാക്കണമെന്നാണ് ആരോഗ്യവിദഗ്ധർ പറയുന്നത്. പ്രോട്ടീൻ സമ്പന്നമാണ് ഇലക്കറികൾ. അതുകൊണ്ട് തന്നെ അവ ആരോഗ്യത്തിന് അനിവാര്യമാണ്. ഇലക്കറി എന്ന് കേൾക്കുമ്പോൾ തന്നെ മനസിലേക്ക് ഓടിയെത്തുന്നത് ചീരയാകും. അധികമായാൽ അമൃതും വിഷമെന്ന് പറയുന്നത് പോലെ, ഇലക്കറികളും ആരോഗ്യത്തിനെ പ്രതികൂലമായി ബാധിക്കാം. ചീര ഏറെ ശ്രദ്ധയോടെ കഴിക്കേണ്ട ഒന്നാണ്. സൂപ്പ,  ഓംലെറ്റ് അല്ലെങ്കിൽ പൊടിച്ച രൂപത്തിൽ പോലും ചീര നാം ഭക്ഷിക്കുന്നു. എന്നാൽ ചീര അമിതമായി കഴിക്കുന്നത് കൊണ്ട് എന്തെങ്കിലും ദോഷമുണ്ടോ?

കലോറി കുറഞ്ഞ ഭക്ഷണമാണ് ചീര. ധാതുക്കളും, കാൽസ്യം, മഗ്നീഷ്യം, ഇരുമ്പ്, വിറ്റാമിൻ എ, സി, കെ തുടങ്ങിയവയും ചീരയിൽ അടങ്ങിയിരിക്കുന്നു. ഇലക്കറികൾ ഭക്ഷണത്തിൽ ഉൾപ്പെടുത്തുന്നത് അർബുദ സാദ്ധ്യത കുറയ്‌ക്കുമെന്ന് പഠനങ്ങൾ പറയുന്നു. ഇലക്കറികളിൽ അടങ്ങിയിരിക്കുന്ന ഒന്നാണ് ഹിസ്റ്റമിൻ. ഇത് ശരീരത്തിലെ കോശങ്ങളിൽ കാണപ്പെടുന്ന രാസവസ്തുവാണ്. ചീര അമിതമായാൽ ഇതുവഴി അലർജിയ്‌ക്ക് കാരണമാകാം. ധാരാളം നാരുകൾ അടങ്ങിയിട്ടുള്ളതിനാൽ ചീര അധികം കഴിച്ചാൽ വയറുവേദന, ഗ്യാസ് തുടങ്ങിയ പ്രശ്‌നങ്ങൾക്ക് കാരണമാകും.

ചീര അമിതമായി കഴിക്കുന്നത് ശരീരത്തിൽ വിഷാംശം ജനിപ്പിക്കും. ചീരയിൽ ഓക്‌സാലിക് ആസിഡ് അടങ്ങിയിട്ടുണ്ട്. സാധാരണ നില കവിയുന്നതോടെ മറ്റ് ധാതുക്കളെ ആഗിരണം ചെയ്യാനുള്ള ശരീരത്തിന്റെ കഴിവിനെ ഓക്‌സാലിക് ആസിഡ് ബാധിക്കുന്നു. ഓക്‌സാലിക് ആസിഡിന്റെ അളവ് വർദ്ധിക്കുകയാണെങ്കിൽ കാൽസ്യം ഓക്‌സേലറ്റുകൾ വൃക്കകളിൽ അടഞ്ഞുകൂടുകയും അതുവഴി വൃക്കയിലെ കല്ലിനും കാരണമാകും. സന്ധിവാതം, നീർവീക്കം എന്നിവ വരാനുമുള്ള സാധ്യതയുണ്ട്.