കൊച്ചി: എസ്എഫ്ഐ സംസ്ഥാന സെക്രട്ടറി പി.എം ആർഷോ ജാമ്യ വ്യവസ്ഥ ലംഘിച്ചതിന് തെളിവ്. പരീക്ഷ എഴുതാൻ നൽകിയത് വ്യാജ സർട്ടിഫിക്കറ്റാണെന്ന് എഐഎസ്എഫ് നേതാവ് നിമിഷ രാജു വെളിപ്പെടുത്തി. മർദ്ദിക്കുകയും, ജാതി അധിക്ഷേപം നടത്തുകയും ചെയ്തെന്ന കേസിൽ പിഎം ആർഷോക്ക് അനുകൂലമായി മൊഴി മാറ്റിയിട്ടില്ലെന്ന് പരാതിക്കാരിയായ നിമിഷ രാജു ജനം ടിവിയോട് പറഞ്ഞു.
അർഷോയ്ക്ക് വേണ്ടി പബ്ലിക് പ്രോസിക്യൂട്ടർ വ്യാജ സത്യവാങ്മൂലം നിർമ്മിച്ചുവെന്നതിന്റെയും കേസ് അട്ടിമറിക്കാൻ പോലീസ് കൂട്ടുനിന്നു എന്നതിന്റെയും തെളിവുകളാണ് പുറത്തു വരുന്നത്. പരാതിക്കാരി തന്നെ തിരിച്ചറിഞ്ഞിട്ടില്ല, ഒരു പരാതിയുമില്ലെന്നായിരുന്നു പി.എം ആർഷോ കോടതിയിൽ സത്യവാങ്മൂലം നൽകിയത്.
‘ആർഷോക്കെതിരായുള്ള പരാതിയിൽ ഞാൻ ഉറച്ചുനിൽക്കുകയാണ്. കൃത്യമായി തന്നെ മൊഴി നൽകിയിട്ടുണ്ട്. സാക്ഷികളായവരുടെ പേരുകൾ കൃത്യമായി പറഞ്ഞും കൊടുത്തിരുന്നു. എന്നാൽ, ആ സാക്ഷികളെയെല്ലാം മാറ്റുകയും പകരം ചില പോലീസുകാരെ സാക്ഷികളാക്കി കൊണ്ടാണ് ഗാന്ധിനഗർ പോലീസ് കേസെടുത്തത്. യാതൊരു അഫിഡവിറ്റും കോടതിക്ക് മുമ്പിൽ ഞാൻ സമർപ്പിച്ചിട്ടില്ല’.
‘കൃത്യമായ രാഷ്ട്രീയ ഇടപെടലുകൾ കേസിൽ ഉണ്ടായിട്ടുണ്ട്. എന്നെ പരിഗണിച്ചില്ല. മൊഴി കൊടുത്തവർ പോലീസുകാരാണ്. അതിൽ ഞാൻ തൃപ്തയല്ല. കേസ് കോടതി ഡ്രോപ്പ് ചെയ്താൽ പോലും പ്രൊട്ടസ്റ്റ് കംപ്ലയിന്റിന് തയ്യാറാവുകയാണ്. അതിന്റെ ഡ്യോക്യുമെന്റ്സിന് തയ്യാറാവുകയാണ്. പരാതിയുമായി ശക്തമായി മുന്നോട്ട് പോവും’- എന്ന് നിമിഷ രാജു ജനം ടിവിയോട് പറഞ്ഞു.
