എറണാകുളം: നടൻ ബിനു അടിമാലി ആശുപത്രി വിട്ടു. വാഹനാപകടത്തിൽപ്പെട്ട് ചികിത്സയിലായിരുന്നു ബിനു അടിമാലി ഇന്ന് രാവിലെയാണ് ആശുപത്രി വിട്ടത്. തനിക്ക് മറ്റ് ആരോഗ്യ പ്രശനങ്ങളൊന്നും ഇല്ലെന്നും ഇപ്പോൾ താൻ നടന്നല്ലേ കാറിൽ കയറിയതെന്നും ബിനു അടിമാലി മാദ്ധ്യമങ്ങളോട് പ്രതികരിച്ചു.
നടൻ കൊല്ലം സുധിയുടെ മരണത്തിനിടയാക്കിയ വാഹനാപകടത്തിലാണ് ഒപ്പം ഉണ്ടായിരുന്ന ബിനു അടിമാലിയ്‌ക്കും പരിക്കേറ്റത്. തൃശൂർ കയ്പമംഗലത്ത് വെച്ച് ഇവർ സഞ്ചരിച്ച കാർ മറ്റൊരു പിക്കപ്പുമായി കൂട്ടി ഇടിക്കുകയായിരുന്നു. വടകരയിൽ നിന്നും പ്രോഗ്രാം കഴിഞ്ഞ് വരുന്ന വഴിയിൽ ആയിരുന്നു അപകടം. ഗുരുതരമായി പരിക്കേറ്റ കൊല്ലം സുധിയെ കൊടുങ്ങല്ലൂർ എആർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ ആയില്ല.
അപകട സമയത്ത് മുന്നിലെ സീറ്റിലാണ് കൊല്ലം സുധി ഇരുന്നത്. ഉല്ലാസ് അരൂർ ആണ് ഇവർ സഞ്ചരിച്ച വാഹനം ഓടിച്ചിരുന്നത്. ഇവർക്കൊപ്പം സഹയാത്രികനായി മഹേഷ് കുഞ്ഞുമോനും ഉണ്ടായിരുന്നു. കഴിഞ്ഞ ദിവസമായിരുന്നു മഹേഷിന്റെ ശസ്ത്രക്രിയ നടന്നത്. ഏകദേശം ഒമ്പത് മണിക്കൂറോളം ശസ്ത്രക്രിയ നടന്നു.
