മണിക്കൂറുകൾ നിന്ന് കാലുകഴച്ചാൽ ഇരിക്കാൻ ഒരു കസേര കിട്ടിയിരുന്നെങ്കിൽ എന്ന് ചിന്തിക്കുന്നവരാണ് മിക്കയാളുകളും. അന്നേരം ഏത് കസേര കിട്ടിയാലും ചാടിയിരുന്ന് പോകുകയും ചെയ്യും.. കുഷ്യനുള്ള കസേരയാണോ ഇരുമ്പുകസേരയാണോ പ്ലാസ്റ്റിക് കസേരയാണോ എന്നൊന്നും ആ സമയത്ത് ആരും നോക്കാറില്ല. പക്ഷെ ഏറെ നേരം തുടർച്ചയായി ഇരിക്കേണ്ടി വരികയാണെങ്കിലോ..? അത്തരം സാഹചര്യങ്ങളിൽ ഇരിക്കാൻ ഏതെങ്കിലുമൊരു കസേര തിരഞ്ഞെടുക്കുന്നത് ഉചിതമല്ല.
ഉദാഹരണത്തിന്, എട്ട് മണിക്കൂറിലധികം ഇരുന്ന് ജോലി ചെയ്യുന്ന ഓഫീസ് ജീവനക്കാർ നമുക്കിടയിലുണ്ട്. അവർ ഏതുതരം കസേരയിലാണ് ഇരിക്കുന്നത് എന്നുള്ളത് ഏറെ പ്രധാനപ്പെട്ട കാര്യമാണ്. ഇരിക്കുന്ന കസേര ശരിയല്ലെങ്കിൽ ഓഫീസ് ജോലി ചെയ്യുന്ന വ്യക്തികളെ നിരവധി ആരോഗ്യപ്രശ്നങ്ങളാണ് കാത്തിരിക്കുന്നതെന്ന് വിദഗ്ധർ ചൂണ്ടിക്കാട്ടുന്നു. ഹൃദ്രോഗവും പ്രമേഹവും ഉൾപ്പെടെ ഗുരുതര രോഗങ്ങൾ പിടിപെടാൻ പോലും തുടർച്ചയായ ഇരിപ്പ് കാരണമാകും. ശരീരത്തിന് അധികസമയം അനാവശ്യമായി സമ്മർദ്ദം അനുഭവപ്പെടുന്നു എന്നതിനാലാണ് ഇത് സംഭവിക്കുന്നത്. അതിനാൽ നട്ടെല്ല് വളയാതെ, ശരീരത്തിന് സമ്മർദ്ദം നൽകാതെ ഇരിക്കുന്നതിന് ‘എർഗണോമിക് കസേരകൾ’ തിരഞ്ഞെടുക്കുന്നത് അഭികാമ്യമാണ്.
തുടർച്ചയായി കസേരയിൽ ഇരിക്കുമ്പോൾ അനുഭവപ്പെടുന്ന പ്രയാസങ്ങളാണ് നടുവേദന, കഴുത്തുവേദന, ഹിപ് പ്രഷർ എന്നിവ. ഇതെല്ലാം കൈകാര്യം ചെയ്യാൻ എർഗണോമിക് കസേരകൾക്ക് സാധിക്കുമെന്നാണ് പറയുന്നത്. ശരീരത്തിലെ രക്തചംക്രമണം ശരിയായ വിധം നടക്കാനും ഇത് സഹായിക്കും. ഏറെ നേരം ഇരിക്കുമ്പോൾ സാധാരണയായി അനുഭവപ്പെടുന്ന ഒന്നാണ് കാലുകൾ മരവിക്കുന്ന അവസ്ഥ. ഇതൊഴിവാക്കാനും എർഗണോമിക് കസേരകൾക്ക് കഴിയും. ഇടുപ്പിന് അനാവശ്യമായി ഉണ്ടാകുന്ന സമ്മർദ്ദത്തെ ഇല്ലാതാക്കുകയും ചെയ്യാം. ഹെഡ് റെസ്റ്റ്, ബാക്ക് റെസ്റ്റ് എന്നിവ അടങ്ങിയിരിക്കുന്നതിനാൽ ഇത് കഴുത്തുവേദനയും നടുവേദനയും വരാനുള്ള സാധ്യതയും ഇല്ലാതാക്കുന്നു. ജോലി സ്ഥലത്ത് എർഗണോമിക് കസേരയാണ് ഉപയോഗിക്കുന്നതെങ്കിൽ ജീവനക്കാർക്ക് സ്ഥിരമായി അനുഭവപ്പെടുന്ന പല ശാരീരിക ബുദ്ധിമുട്ടുകളും പമ്പകടക്കും. ഇതോടെ ഉത്പാദന ക്ഷമത വർധിക്കുകയും ചെയ്യുന്നു.
