തിരുവനന്തപുരം: ന്യൂയോർക്കിലെ ടൈം സ്ക്വയർ സമ്മേളനത്തിൽ പങ്കെടുത്ത മുഖ്യമന്ത്രി പിണറായി വിജന്റെ ചിത്രം സമൂഹമാദ്ധ്യമങ്ങളിൽ വൈറലായിരുന്നു. അമേരിക്കയെ നാഴികയ്ക്ക് നാൽപത് വട്ടം വിമർശിക്കുന്ന സിപിഎം നേതാക്കൾ ആ രാജ്യത്ത് നടക്കുന്ന പരിപാടികളിൽ വിദേശ വസ്ത്രം ധരിച്ച് പങ്കെടുക്കുന്നതിനെതിരെ കടുത്ത വിമർശനങ്ങൾ സമൂഹമാദ്ധ്യമങ്ങളിൽ ഉയരുന്നുണ്ട്. സിപിഎം സംസ്ഥാന സെക്രട്ടറി എം.വി ഗോവിന്ദനും മുഖ്യമന്ത്രി പിണറായി വിജയനുമടക്കമുള്ള നേതാക്കളുടെ വിദേശ സന്ദർശനത്തെ രാഷ്ട്രീയ നിരീക്ഷകർ നിരന്തരം വിമർശിക്കുന്നു. ഇപ്പോഴിതാ, മുഖ്യമന്ത്രിയെ പരിഹസിച്ചു കൊണ്ട് രംഗത്തെത്തിയിരിക്കുകയാണ് രാഷ്ട്രീയ നിരീക്ഷകൻ അഡ്വ എ.ജയശങ്കർ.
‘ഇത്ര ധന്യത തികഞ്ഞു കാൺകയില്ലത്ര നൂനമൊരു സാർവ്വഭൗമനിൽ. ന്യൂയോർക്കിലെ ജനത്തിരക്കേറിയ ടൈം സ്ക്വയറിൽ, മുതലാളിത്തത്തെ നിലംപരിശാക്കി ചെങ്കൊടി പാറിക്കുന്ന മംഗള മുഹൂർത്തം സ്വപ്നം കാണുന്ന നമ്മുടെ ജൈവ ബുദ്ധിജീവി’- എന്ന അടികുറിപ്പോടെയാണ് മുഖ്യമന്ത്രി പിണറായി വിജയൻ വേദിയിലിരിക്കുന്ന ചിത്രം എ.ജയശങ്കർ സമൂഹമാദ്ധ്യമങ്ങളിൽ പങ്കുവെച്ചിരിക്കുന്നത്. മുഖ്യമന്ത്രിയുടെ ചിത്രം ട്രോളന്മാരും ഏറ്റെടുത്തിരുന്നു.
അതേസമയം, മുഖ്യമന്ത്രിയുടെ ടൈം സ്ക്വയർ സമ്മേളനത്തിൽ പങ്കെടുത്തത് വിരലിലെണ്ണാവുന്നവർ മാത്രമായിരുന്നു. രണ്ടര ലക്ഷം അമേരിക്കക്കാർ പ്രസംഗം കേൾക്കും, ആയിരം പ്രവാസി മലയാളികൾ പങ്കെടുക്കും എന്നായിരുന്നു സംഘാടകരുടെ അവകാശവാദം. ലോക കേരള സഭയിലെ 200 ഓളം പ്രതിനിധികൾ മുൻ കസേരകളിൽ ഇരുന്നുകൊണ്ടാണ് സദസ് ഉണ്ടെന്ന പ്രതീതീ ജനിപ്പിച്ചത്. മുഖ്യമന്ത്രിയുടെ പരിപാടി നടക്കുന്നതിന് സമീപത്തായി വേറെ പരിപാടികളും തത്സമയം നടന്നിരുന്നു. ആ പരിപാടികൾ വീക്ഷിക്കാനെത്തിയ ജനങ്ങളുടെ ചിത്രം പങ്കുവെച്ചുകൊണ്ടായിരുന്നു മുഖ്യമന്ത്രിയെ കാണാൻ പതിനായിരങ്ങൾ തടിച്ചുകൂടി എന്ന തരത്തിൽ സമൂഹമാദ്ധ്യമങ്ങളിൽ വാർത്തകൾ പ്രചരിപ്പിച്ചത്.
