മുരളി ഗോപി കഥയെഴുതി അരുൺ കുമാർ അരവിന്ദ് സംവിധാനം ചെയ്ത ചിത്രമായിരുന്നു ലെഫ്റ്റ് റൈറ്റ് ലെഫ്റ്റ്. 2013-ൽ പുറത്തിറങ്ങിയ ചിത്രം കേരളക്കരയിൽ കോളിളക്കം സൃഷ്ടിച്ചിരുന്നു. സിപിഎമ്മിനെ പ്രത്യക്ഷമായും പരോക്ഷമായും വിമർശിച്ച ഒരു ചിത്രമായിരുന്നു ലെഫ്റ്റ് റൈറ്റ് ലെഫ്റ്റ്. മലയാളത്തിലെ തന്നെ മികച്ച രാഷ്ട്രീയ ത്രില്ലറുകളിലൊന്നാണ് മുരളി ഗോപിയുടെ തൂലികയിൽ നിന്നും പിറന്നത്. എന്നാൽ, കമ്യൂണിസ്റ്റ് പാർട്ടിയുടെയും നേതാക്കളുടെയും പൊള്ളത്തരങ്ങൾ തുറന്നു കാട്ടിയ ചിത്രത്തിനെതിരെ പ്രതിഷേധവുമായി പാർട്ടി പ്രവർത്തകർ രംഗത്തു വരികയായിരുന്നു.
സിപിഎം ശക്തി കേന്ദ്രങ്ങളിൽ സിനിമയ്ക്ക് വിലക്ക് ഏർപ്പെടുത്തി. തിയറ്റർ ഉടമകളെ ഭീഷണിപ്പെടുത്തിയാണ് പലയിടത്തു നിന്നും പ്രദർശനങ്ങൽ റദ്ദാക്കിയത്. ഇപ്പോഴിതാ, ലെഫ്റ്റ് റൈറ്റ് ലെഫ്റ്റ് പുറത്തിറങ്ങിയിട്ട് 10 വർഷം തികഞ്ഞതിന്റെ സന്തോഷം പങ്കുവെയ്ക്കുകയാണ് മുരളി ഗോപി. 2013 ജൂൺ 14-നാണ് സിനിമ തിയറ്ററുകളിലെത്തിയത്. സിനിമ ഇറങ്ങിയപ്പോൾ തങ്ങൾക്ക് നേരിടേണ്ടി വന്ന വെല്ലുവിളികളെ ഓർത്തെടുത്തു കൊണ്ടാണ് 10 വർഷം പൂർത്തിയായതിന്റെ സന്തോഷം താരം പങ്കുവെയ്ക്കുന്നത്. സിനിമയുടെ ഒരു ട്രെയിലറും അണിയറ പ്രവർത്തകർ പുറത്തിറക്കിയിട്ടുണ്ട്.
‘ഇന്ന്, LEFT RIGHT LEFT ഒരു ദശകം പൂർത്തിയാക്കുന്നു. റിലീസായപ്പോൾ നിരവധി തിയേറ്ററുകളിൽ നിന്ന് രഹസ്യമായി പിൻവലിച്ച ഒരു ചിത്രം LRL കാലത്തിന്റെ വേലിയേറ്റങ്ങളെ അതിജീവിച്ചു. ഇപ്പോഴും ഓർമ്മിക്കപ്പെടുന്നുണ്ട്. ഒരു എഴുത്തുകാരൻ എപ്പോഴെങ്കിലും ആഗ്രഹിക്കുന്ന ഒരേയൊരു കാര്യം ഇതാണ്. LRL-ന്റെ അസോസിയേറ്റ് എഡിറ്റർ വരുൺ എസ് ഉണ്ണിയോടും എന്റെ പ്രിയ സുഹൃത്തും സംവിധായകനുമായ അരുൺ കുമാർ അരവിന്ദും നന്ദി. സിനിമയുടെ ട്രെയിലർ ഇവിടെ പങ്കുവെയ്ക്കുന്നു’- എന്നാണ് മുരളി ഗോപി ഫേയ്സ്ബുക്കിൽ കുറിച്ചിരിക്കുന്നത്.
