ബ്രഹ്മാണ്ഡ റിലീസിനൊരുങ്ങി ആദിപുരുഷ്. ജൂൺ 16-നാണ് ചിത്രം തിയേറ്ററുകളിലെത്തുന്നത്. പ്രഭാസ് ചിത്രത്തിൽ രാമനായി അഭിനയിക്കുമ്പോൾ സെയ്ഫ് അലി ഖാനാണ് രാവണ വേഷത്തിലെത്തുന്നത്. ഒന്നാം ദിനം തന്നെ വമ്പൻ സ്വീകാര്യത ലഭിക്കുമെന്നാണ് ഓൺലൈൻ ബുക്കിംഗ് കണക്കുകൾ വ്യക്തമാക്കുന്നത്.
ഒരേ സമയം ഹിന്ദിയിലും തെലുങ്കിലുമാണ് ആദിപുരുഷ് ചിത്രീകരിച്ചിരിക്കുന്നത്. തമിഴ്, കന്നഡ, മലയാളം ഭാഷകളിലേക്ക് ചിത്രം മൊഴിമാറ്റം ചെയ്തിട്ടുണ്ട്.
ആദിപുരുഷിന്റെ ഹിന്ദി പതിപ്പ് ആദ്യ ദിനം തന്നെ 30 കോടിയിലധികം കളക്ഷൻ നേടുമെന്നാണ് വിലയിരുത്തപ്പെടുന്നത്. പ്രമുഖ മൾട്ടിപ്ലക്സ് ശൃംഖലയായ INOX, PVR, Cinepolis എന്നിവിടങ്ങളിലാകും ആദ്യ ദിവസം ഹിന്ദി പതിപ്പ് റിലീസ് ചെയ്യുക.
ഹിന്ദി പതിപ്പിനായി വിറ്റ ടിക്കറ്റുകളുടെ എണ്ണം 1.13 ലക്ഷമാണ്. ചിത്രം 2ഡി, 3ഡി സ്ക്രീനുകളിലാകും റിലീസ് ചെയ്യുക. ഹിന്ദിയിൽ മാത്രം 4,000 സ്ക്രീനുകളിലും മറ്റ് ഭാഷകളിലായി 6,200 സ്ക്രീനുകളിലുമാകും ചിത്രം റിലീസ് ചെയ്യുന്നത്. ഈ വർഷത്തെ ഏറ്റവും വലിയ റിലീസായിരിക്കും ആദിപുരുഷ് എന്ന കാര്യത്തിൽ സംശയമില്ല.
ഇന്ത്യൻ സിനിമയിൽ തന്നെ സമീപകാലത്ത് ഏറ്റവുമധികം പ്രി റിലീസ് പബ്ലിസിറ്റിയുമായെത്തുന്ന ചിത്രമാണ് ആദിപുരുഷ്. രാമായണം പശ്ചാത്തലമാക്കുന്ന എപിക് മിത്തോളജിക്കൽ ചിത്രത്തിന്റെ രചനയും സംവിധാനവും ഓം റാവത്താണ്. 500 കോടി രൂപയാണ് ചിത്രത്തിന്റെ നിർമ്മാണച്ചെലവ്. ഇത് തിരിച്ചുപിടിച്ചതായാണ് കണക്കുകൾ പറയുന്നത്. സാറ്റ്ലൈറ്റ്, ഡിജിറ്റൽ, മ്യൂസിക്, മറ്റ് റൈറ്റ്സുകളുടെ വിൽപന വഴി 247 കോടി രൂപയാണ് ചിത്രം സമാഹരിച്ചതെന്നാണ് റിപ്പോർട്ട്.
