പത്തോ ഇരുപതോ രൂപയുടെ ചായ കുടിച്ച് ഗൂഗിൾ പേ ചെയ്യുമ്പോൾ സെർവർ തകരാർ കാരണം ടെൻഷനടിച്ചിട്ടുണ്ടോ? ഇനി ടെൻഷൻ ആവശ്യമില്ല. കാരണം യുപിഐ ലൈറ്റ് സേവനം ഇനി ഗൂഗിൾ പേയിലും.
ചെറിയ ഓൺലൈൻ പെയ്മെന്റ് അതിവേഗം നടത്താനുള്ള സംവിധാനമാണ് യുപിഐ ലൈറ്റ്. പിൻ നമ്പർ ടൈപ്പ് ചെയ്യാതെ 200 രൂപയിൽ താഴെയുള്ള യുപിഎ ഇടപാടുകൾ നടത്താനുള്ള പുത്തൻ ഫീച്ചറാണ് ഇത്.
ഗൂഗിൾ പേയുള്ള ഉപയോക്താക്കൾക്ക് ലൈറ്റ് സേവനവും ഉപയോഗപ്പെടുത്താം. അതിനായി ഗൂഗിൾ പേ തുറന്ന് വലതുവശത്ത് മുകളിലായുള്ള പ്രൊഫൈൽ ചിത്രത്തിൽ ടാപ്പ് ചെയ്യുക. ‘Set up payment methods’ എന്നതിന് താഴെ വലതുവശത്തായി യുപിഎ ലൈറ്റ് എന്ന ഓപ്ഷൻ കാണാം. അത് തിരഞ്ഞെടുത്തതിന് ശേഷം ‘continue’ കൊടുക്കുക. തുടർന്ന് 2000 രൂപ വരെ ഗൂഗിൾ ലൈറ്റിലേക്ക് ചേർക്കുക. ഈ സമയത്ത് യുപിഐ പിൻ നമ്പർ നൽകേണ്ടിവരും. തുക ലൈറ്റിൽ ആക്ടിവേറ്റ് ആയിക്കഴിഞ്ഞാൽ പിന്നീട് നടത്തുന്ന 200 രൂപ വരെയുള്ള പേയ്മെന്റുകൾക്ക് പിൻ നമ്പർ നൽകേണ്ടതില്ല മാത്രമല്ല സെർവർ തകരാറും ഇടപാടുകളെ ബാധിക്കില്ല.
