തിരുവനന്തപുരം: വെള്ളത്തിൽ യോഗാഭ്യാസം ചെയ്ത് സൈനികർ. തിരുവനന്തപുരം പാങ്ങോട് സൈനിക കേന്ദ്രത്തിലെ സൈനികരാണ് വെള്ളത്തിൽ യോഗാ ചെയ്തത്. അന്താരാഷ്ട്ര യോഗാ ദിനത്തോടനുബന്ധിച്ചായിരുന്നു യോഗാഭ്യാസം. ഞെടിയിടയിലാണ് യോഗാഭ്യാസത്തിന്റെ വീഡിയോ വൈറലായത്. ഒരു മണിക്കൂറിനകം 12,000-ത്തിലധികം പേരാണ് വീഡിയോ കണ്ടത്.
2015 ജൂൺ 21 മുതലാണ് അന്താരാഷ്ട്രതലത്തിൽ യോഗാദിനം ആചരിച്ച് തുടങ്ങിയത്. യോഗാദിനം ആചരിക്കാനും യോഗ ദൈനംദിന ജീവിതത്തിന്റെ ഭാഗമാക്കാനും ആഹ്വാനം ചെയ്തത് പ്രധാനമന്ത്രി നരേന്ദ്രമോദിയാണ്. തുടർന്ന് യുഎൻ ജനറൽ അസംബ്ലി യോഗദിനം ആചരിക്കാൻ തീരുമാനിക്കുകയായിരുന്നു. ശരീരം, മനസ്, ആത്മാവ് എന്നിവ സന്തുലിതാവസ്ഥയിൽ കൊണ്ടുവരുന്നതിൽ പ്രധാന പങ്ക് യോഗയ്ക്കുണ്ട്.
യമം, നിയമം, ആസനം, പ്രാണായാമം, പ്രത്യാഹാരം, ധാരണ, ധ്യാനം, സമാധി എന്നിങ്ങനെ എട്ട് വിഭാഗങ്ങളാണ് യോഗയ്ക്കുള്ളത്. ആദ്യത്തെ നാലെണ്ണം ശരീരവും മനസും പുഷ്ടിപ്പെടുത്തുമ്പോൾ അടുത്ത നാലെണ്ണം ആധ്യാത്മിക ഉന്നതി നൽകുന്നു.
