ഹൈദരാബാദ്: വർഷങ്ങൾ നീണ്ട കാലത്തിന് ശേഷമാണ് രാം ചരൺ, ഉപാസന ദമ്പതികൾക്ക് പെൺകുഞ്ഞ് പിറന്നത്. ഹൈദരാബാദിലെ അപ്പോളോ ആശുപത്രിയിൽ വച്ചാണ് ജൂണ് 20 നാണ് ഉപാസന പെൺകുഞ്ഞിന് ജന്മം നൽകിയത്. ഇപ്പോഴിതാ, ആശുപത്രിയിൽ നിന്നും അമ്മയും കുഞ്ഞും ഡിസ്ചാര്ജ് ആയി പുറത്തേക്ക് വരുന്ന ചിത്രങ്ങളാണ് പുറത്ത് വരുന്നത്. ഉപസാനയ്ക്കൊപ്പം കുഞ്ഞിനെ കയ്യിലേന്തി ആശുപത്രിയുടെ പുറത്തേക്ക് വരുന്ന രാം ചരണിനെയും കാണാവുന്നതാണ്.
പതിനൊന്ന് വർഷത്തെ കാത്തിരിപ്പുകൾക്ക് ഒടുവിലാണ് രാം ചരണിനും ഉപാസനയ്ക്കും കുഞ്ഞ് പിറന്നത്. അതുകൊണ്ട് തന്നെ ചിരഞ്ജീവി കുടുംബം തങ്ങളുടെ രാജകുമാരിയുടെ വരവ് ആഘോഷമാക്കുകയാണ്. കഴിഞ്ഞ ഡിസംബറിലാണ് ഉപാസന അമ്മയാകാൻ തയാറെടുക്കുകയാണെന്ന വിവരം ആരാധകരെ അറിയിച്ചത്. കഴിഞ്ഞ ആഴ്ച ഉപാസന തന്റെ ഇൻസ്റ്റാഗ്രാം അക്കൗണ്ടിലൂടെ ഹൈദരാബാദിലെ ജൂബിലി ഹിൽസിലെ അപ്പോളോ ഹോസ്പിറ്റലിൽ നിന്നുള്ള ചിത്രവും പങ്കുവെച്ചിരുന്നു. വളരെ സ്പെഷ്യൽ ആയ ഒന്ന് ഉടൻ വരുന്നുവെന്നായിരുന്നു ചിത്രത്തോടൊപ്പം ഉപാസന കുറിച്ചത്.
2012 ജൂൺ 14 നായിരുന്നു രാം ചരണും ഉപാസനയും തമ്മിലുള്ള വിവാഹം. കോളേജ് പഠന കാലത്ത് ലണ്ടനിൽ വെച്ച് കണ്ടുമുട്ടിയ ഇരുവരും സൗഹൃദത്തിലാകുകയും പിന്നീട് പ്രണയത്തിലാകുകയുമായിരുന്നു. സൂപ്പർ സ്റ്റാർ ആയിരിക്കുമ്പോൾ തന്നെ അൽപ്പം നാണം കുണുങ്ങിയ രീതികളുള്ള താരം കോളേജ് കാലഘട്ടത്തിലായിരുന്നു വിപരീത സ്വഭാവ ഗുണങ്ങളുള്ള ഉപാസനയെ കാണുന്നത്. 2011-ലായിരുന്നു ഇരുവരും തമ്മിൽ വിവാഹ നിശ്ചയം നടക്കുന്നത്. ഹനുമാൻ ജിയുടെ അനുഗ്രഹത്തോടെ ഉപാസനയും രാംചരണും അവരുടെ ആദ്യ കുഞ്ഞിന്റെ വരവിനായി കാത്തിരിക്കുന്നുവെന്ന കാര്യം പങ്കുവെച്ചത് ചിരഞ്ജീവി ആയിരുന്നു.
Comments